SQO-da jasandy ıntellektiniń kómegimen mektepterde quqyq buzýshylyqtarǵa jol berilmedi
PETROPAVL. KAZINFORM — Soltústik Qazaqstan oblysynyń mektepterinde beınebaqylaý kameralarymen biriktirilgen jasandy ıntellekt júıesi jumys istep jatyr.
SQO prokýratýrasynyń málimetinshe, búginde bul júıe 37 bilim berý mekemesine ornatylǵan. Bul prokýratýra men ákimdiktiń oqýshylardyń quqyǵy men múddesin qorǵaýǵa baǵyttalǵan «Balalyq shaqtyń tsıfrlyq kúzetshisi» jobasy aıasynda qolǵa alyndy.
— Bul júıeniń beınebaqylaýdan ereksheligi, ol agressıvti minez-qulyqty tirkeıdi jáne ol týraly mektep ákimshiligi men prokýratýraǵa habarlaıdy. Jasandy ıntellekt júıesi arqyly jyl basynan beri kámeletke tolmaǵandar arasynda bes quqyq buzýshylyqqa jol berilmedi. Qazir stýdentterdiń emotsıonaldy jaǵdaıyn bet álpeti boıynsha anyqtaıtyn tehnologııa engizilmek, bul stressti ýaqytynda anyqtaýǵa jáne balalarǵa qoldaý kórsetýge múmkindik beredi, — deıdi prokýratýra ókilderi.
Sondaı-aq mobıldi operatorlarmen birlesip tyıym salynǵan ınternet-resýrstardy shekteıtin júıe engizilip jatyr, ol birinshi toqsannyń sońynda iske qosylady. Kámeletke tolmaǵandardyń qaýipti kontentke kirgeni anyqtalǵan jaǵdaıda aqparat tekserýge jiberiledi jáne rastalǵan jaǵdaıda shekteý sharalary qabyldanady. Mamandardyń aıtýynsha, bul jobalar árbir bala úshin qaýipsiz jáne jaıly bilim berý ortasyn qurýǵa baǵyttalǵan.
Buǵan deıin SQO-nyń birneshe aýdanynda balaǵa qatysty týystary tarapynan seksýaldy zorlyq-zombylyq jasalǵanyn jazǵan edik.