SQO-da «Jasampazdyq jylnamasy» atty kitaptyń tusaýy kesildi
«Jasampazdyq jylnamasy» jınaǵy - oblystaǵy qara shańyraq «Soltüstık Qazaqstan» gazeti ujymynyń óz oqyrmandaryna aıtýly merekege arnaǵan tartýy. «Qyzyljar-Aqparat» JShS dırektory, jýrnalıst Jarasbaı Súleımenov bastaǵan tilshiler qaýymynyń birlesken eńbegi tutas bir kezeńdi qamtyp, óńir turǵyndarynyń turmysyn, olardyń eldiń qalyptasýy úshin qosqan úlesin pash etedi. Saltanatty is-sharaǵa Soltústik Qazaqstan oblysy ákiminiń orynbasary Ǵanı Nyǵymetov, zııaly qaýym ókilderi, basylymnyń ardagerleri men jýrnalısteri, kitaphana qyzmetkerleri, jas qalamgerler qatysty.
«Jańa bıik asýlardy baǵyndyrýǵa judyryqtaı jumylǵan óńir jurtshylyǵynyń qajyrly eńbegi az emes. Ótpeli kezeń ótkelderinen ótip, qıyndyqty eńserý jolynda qaryshty qadam jasaǵan soltústik oblystyń el tarıhyndaǵy biregeı belesteri aýyz toltyryp aıtarlyqtaı. Elimizdiń «Soltústik qaqpasy» atanǵan bul óńirdiń aıshyqty belesteri, jańa dáýirdegi búgingi tynys-tirshiligi, jalpy saıası-ekonomıkalyq, áleýmettik salalarda qol jetkizgen tolaǵaı tabystary atalmysh jınaqqa arqaý boldy», - deıdi gazet ujymy.
Jınaq oblystyq ákimdiktiń qoldaýymen Almatydaǵy «Altyn kitap» baspasynan 1000 danamen jaryq kórdi. Áli sııasy keýip úlgermegen jınaqtyń tusaýyn Ǵanı Nyǵymetov, Jarasbaı Súleımenov pen gazet ardageri Amandyq Jantemirov kesti.
«Barshańyzdy elimizdiń eń qasterli merekesimen quttyqtaımyn. Otyz jyl tarıh úshin qas-qaǵym sát, alaıda elimiz osynaý úsh ondyq ishinde álemniń keıbir elderi jete almaǵan belesterdi baǵyndyrdy. Mereke qarsańynda árbir azamat, ár ujym, mekeme óz-ózine 30 jylda ne tyndyrdym, qandaı belesterdi baǵyndyrdym degen suraq qoıady. Sonyń ishinde «Jasampazdyq jylnamasy» atty kitap oblystyq «Soltüstık Qazaqstan» gazetiniń elimizdiń Táýelsizdigine arnaǵan úlken tartýy», - dedi Ǵanı Nyǵymetov.
Sondaı-aq ol Qumar Aqsaqalovtyń atynan merekege oraı óńirdiń áleýmettik-ekonomıkalyq damýyna qosqan eleýli úlesi úshin «Qyzyljar-Aqparat» jaýapkershiligi shekteýli seriktestiginiń dırektory, jýrnalıst Jarasbaı Súleımenov pen «Soltüstık Qazaqstan» gazeti bas redaktorynyń orynbasary Saǵyndyq Maýǵazınge oblys ákiminiń Qurmet gramotasyn tapsyrdy.
Jıynda «Soltüstık Qazaqstan» gazeti uıymdastyrǵan jas aqyndar músháırasynyń qorytyndysy da shyǵaryldy. Dıas Aıaǵan birinshi, Abylaıhan Áshimhan ekinshi, Dáýlet Qurmash úshinshi orynǵa ıe boldy. Jeńimpazdar dıplommen jáne aqshalaı syıaqymen marapattaldy.
