SQO-da jas qyzdy zorlaǵan 5 adamǵa úkim shyqty
SQO qylmystyq ister jónindegi mamandandyrylǵan aýdanaralyq sotynyń málimetinshe, byltyr 11 maýsymda Petropavldaǵy demalys oryndarynyń birinde 5 jigit kámeletke tolmaǵan qyzdy zorlap, seksýaldyq sıpattaǵy zorlyq-zombylyq jasaǵan. Qylmyskerlerdiń úsheýi sol kezde mas bolǵan.
Sottalýshylardyń kinási jábirlenýshiniń, kýágerlerdiń aıǵaqtarymen, saraptama qorytyndylarymen jáne basqa da dáleldemelermen anyqtaldy.
Prokýror R., S. jáne B.-ny 16 jylǵa bas bostandyǵynan aıyrýdy, M. jáne I.-ge qatysty 10 jyl bas bostandyǵynan aıyrý jazasyn taǵaıyndaýdy surady. Jábirlenýshiniń zańdy ókili prokýrordyń ustanymyn qoldady. Jalpy qylmystyń bul túrine 15 jyldan 17 jylǵa deıingi merzimge bas bostandyǵynan aıyrý túrindegi jaza kózdelgen.
Sottalýshylar óz kinásin moıyndamady jáne olardy aqtaýdy surady.
Sot mas kúıde qylmys jasaýdy aýyrlatatyn jaǵdaı dep tanydy, I. men M.-nyń kámelet jasyna tolmaǵanyn esepke alyp, jazany jeńildetti.
Sot R., B. jáne S.-ny 16 jylǵa bas bostandyǵynan aıyrdy. Olarǵa pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarýǵa ómir boıyna tyıym salyndy.
Al M. men I.-ge kámeletke tolmaǵandardy bas bostandyǵynan aıyrýdyń eń joǵary merzimi – 10 jyl berildi. Sondaı-aq olar pedagogıkalyq laýazymdardy jáne kámeletke tolmaǵandarmen jumys isteýge baılanysty laýazymdardy atqarý quqyǵynan 2 jyl merzimge aıyryldy.
Sot jábirlenýshi qyzdyń azamattyq talap-aryzyn tolyq qanaǵattandyryp, sottalýshylardan moraldyq zııan retinde 10 mln teńge óndirip alynatyn boldy.