SQO-da jas kásipkerler qyzmet kórsetý salasyna basymdyq beredi
PETROPAVL. QazAqparat – Soltústik Qazaqstan oblysynda «Jas kásipker» pılottyq jobasy aıaqtalyp, 600 adam kásipkerlik negizimen tanysýǵa múmkindik aldy, dep habarlaıdy QazAqparat.
SQO Kásipkerler palatasy baspasóz qyzmetiniń málimetinshe, jastar eki apta boıy bıznesti júrgizýdiń qyr-syrymen tanysyp, marketıng, naryqty taldaý daǵdylaryn meńgerdi. Búgin alǵan bilimderin kórsetip, bıznes-jobalaryn qorǵady.
«Meniń tobymda 53 adam oqydy. Solardyń 70%-i qyzmet kórsetý salasyn tańdap otyr. Aralarynda ınnovatsııalyq, áleýmettik jobalar da bar», - deıdi «Jas kásipker» jobasynyń bıznes-jattyqtyrýshysy Ársen Orazalınov.
Jobalaryn sátti qorǵaǵan kýrsanttar 200 AEK mólsherinde grant alý úshin ótinish bere alady. Petropavl qalasynyń turǵyny Grıgorıı Rodıonov bolashaqta metall buıymdaryn jasamaq. Óz isin ashýdy josparlap otyr. Grant utyp alǵan jaǵdaıda aqshany qondyrǵy satyp alýǵa jumsaıdy.
28 jastaǵy Qaırat Jumadı Petropavlda emdeý-ońaltý ortalyǵyn ashpaqshy. Oıyn júzege asyrý úshin granttan bólek nesıe de alýy kerek.
«Qazir býyny syrqyrap, omyrtqa jotasy aýyratyndar óte kóp. Qalada arnaıy trenajerlary bar ortalyqtar sanaýly ǵana. Sondyqtan meniń emdeý-ońaltý ortalyǵyma suranystyń joǵary bolatynyna senimdimin. Medıtsınalyq bilimim bar. Endi arnaıy trenajerlardy satyp alý qajet. «Jas kásipker» baǵdarlamasymen meniń kópten bergi armanym oryndalmaqshy», - deıdi Qaırat Jumadı.
Oblysta «Jas kásipker» baǵdarlamasy boıynsha eki legte 600 adam bilim aldy. Olardyń 70-ine alǵashqy granttar 200 AEK nemese 505 myń teńge bólindi. Qalǵandarynyń ótinishi aı sońyna deıin qaralady.
Jumyssyz júrgen jáne ózin-ózi jumyspen qamtyǵan jastardy qoldaý maqsatynda oblysta 24-shilde kúni «Jas kásipker» pılottyq jobasy bastaý aldy. Kýrstan ótken tyńdaýshylar endi óz isterin asha alady. Al 9-qyrkúıek Petropavlda «Bastaý» jobasy boıynsha oqý bastalady.
