SQO-da jas dárigerlerge 2,5 mln teńge kótermeaqy beriledi

NUR-SULTAN. QazAqparat – Soltústik Qazaqstan oblysynyń ákimi Qumar Aqsaqalov óńirde dáriger tapshylyǵy qalaı sheshilip jatqanyn aıtty, dep habarlaıdy QazAqparat.

«Medıtsına salasyndaǵy maman tapshylyǵyn birtindep sheship jatyrmyz. Óńirde alǵash ret 2,5 mln teńge kóleminde kóterme tólem berý jolǵa qoıyldy. El boıynsha eń kóp tólem bizde deýge bolady. Bıyl osy bastama aıasynda 128 dárigerdiń kelýin kútip otyrmyz. Bıýdjet esebinen tar beıindi mamandyq boıynsha rezıdentýrada bilim alǵan 30 dáriger kelmekshi», - dedi aımaq basshysy.

Ákimniń sózine qaraǵanda, kóp ótpeı aýyldyq eldi mekenderde 47 medıtsınalyq nysannyń qurylysy bastalýy kerek. Sondaı-aq, ol óńirde qaterli aýrýlardan keletin ólim jitimniń jyl sanap azaıyp kele jatqanyna nazar aýdartty.

«Úsh jylda onkologııa boıynsha ólim-jitim 13%-ǵa qanaınalym júıesi aýrýlarynyń ólimi 10%-ǵa, ınsýlt pen ınfarktan kóz jumatyndar sany 2%-ǵa-, náreste ólimi 13%-ǵa, týberkýlezben aýyrý 37%-ǵa azaıdy. Bul sandardyń artynda dárigerlerimizdiń ólsheýsiz eńbegi jatyr», - dedi Qumar Aqsaqalov.