SQO-da «Jas balýan» lıgasyna sportqa endi qadam basqan balalar qatysyp jatyr
PETROPAVL. KAZINFORM – Soltústik Qazaqstan oblysy Beskól aýylynda dástúrli «Jas balýan» lıgasy ótip jatyr. Ereksheligi – grek-rım kúresine endi kelgen balalar arasynda uıymdastyrylýy.
Oblystyq jarysqa bul joly Qaraǵandy, Rýdnyıdan jáne Qytaı Halyq Respýblıkasynyń jas balýandary da qatysyp jatyr. Bir kúnge shaqtalǵan jarysta 7-14 jastaǵy 300 bala beldesedi.
- Bul joba alǵash ret 2024 jyldyń jeltoqsan aıynda qolǵa alyndy. Synaq retinde alǵashqy týrdy uıymdastyrdyq. Boz kilemge 50 balýanymyz shyqty. Jaqsy ótti. Sodan beri óńirdegi jattyqtyrýshylar bárimiz birge aı saıyn osy lıgany uıymdastyryp kelemiz.
Maqsat – balalar men jasóspirimder kúresin damytý, balalarymyzǵa motıvatsııa berý. Kúresti jappaı, qoljetimdi ári júıeli sport túrine aınaldyrý. Balalar bir orynda toqtap qalmaı, týrdan týrǵa ótip, tájirıbe jınap, ózine degen senimdiligin arttyryp, minez-qulqyn shyńdaýy tıis, - deıdi «Jas balýan» jobasynyń avtory, oblystyq olımpıadalyq rezervtegi mektep-ınternat-kolledjdiń jattyqtyrýshy-oqytýshysy Seráli Qusaıynov.
Mamannyń aıtýynsha, búginde 8-12 jas aralyǵyndaǵy balalar úshin jarystar óte az - jylyna bar bolǵany 1-2 ret qana ótedi. Sonyń saldarynan kóptegen jas balýandardyń qyzyǵýshylyǵy tómendep, sporttan ketip jatady. «Jas balýan» lıgasy osy máseleni sheshýdi kózdeıdi.
- Jyl sońyna deıin 10 týr ótkizemiz. Sondaı-aq, ár besinshi týr – mereıtoılyq. Qýantarlyǵy – qatysýshylar sany artyp keledi. Kórshi oblystar da qosylyp jatyr.
Bul lıgada qatysqan balalardyń barlyǵy medal-gramotamen marapattalady.
Meniń bul salada júrgenime 20 jyldan asty. Óńirde balalar men jasóspirimderdi sportta ustap qalýda úlken másele bar. Sektsııaǵa 20 bala kelse, bir jyldan keıin sonyń beseýi ǵana qalady. Al qazir jaǵdaı ózgerip keledi, - deıdi Seráli Qusaıynov.
Balalar boz kilemde eki mınýt kúresedi. Sol aralyqta tehnıkaalyq ádis qoldanyp úlgerýi tıis.
9 jasar Gleb Krıvogýzov jarysqa qatysý úshin Petropavldan anasy Krıstınamen birge kelgen.
Onyń kúrespen aınalysyp júrgenine bıyl tórtinshi jyl.
- Kúreske bergenimizge ókingen emespiz. Bul jerde, eń bastysy tártipke úırendi. Balamyzdyń, jalpy, sportqa qyzyǵýshylyǵy joǵary. «Jas balýan» lıgasyna da birneshe ret qatystyq, oryndar aldyq. Osyndaı jarystardyń kóp bolǵanyn qalaımyz. Ulymyzdy úlken sportta kórgimiz keledi, - deıdi Petropavl turǵyny Krıstına Krıvogýzova.
«Jas balýan» lıgasynda Qytaıdan kelgen úsh balýan óner kórsetpek.
- Biz qazir Petropavldaǵy oblystyq sport mektep-ınternatynda oqý-jattyǵýdan ótip jatyrmyz. Beıjińnen 20 kúnge 10-15 jastaǵy alty tárbıelenýshimdi alyp keldim. Qazaqstanǵa birinshi ret sapar shektik, jaqsy qarsy aldy. Barlyǵy kóńilimizden shyqty. Tek tamaǵyna áli úırenise almaı jatyrmyz.
Munda sportqa degen kózqaras unady. Tehnıkaǵa asa mán beredi eken. Men de muny quptaımyn.
Ósip kele jatqan balalardyń fızıkasy ekinshi orynda bolýy tıis.
Qazaqstanmen sportta jaqsy baılanys ornatqymyz keledi. Buǵan deıin qazaqstandyq sportshylar bizde daıyndyqtan ótti, endi biz kelip, tájirıbe almasyp jatyrmyz, - deıdi
Fanshan táýeldi kúres klýbynyń jattyqtyrýshysy Shıaý Nan.
Buǵan deıin qazaqstandyq balýandar halyqaralyq týrnırde 2 kúmis medal alǵanyn jazǵan edik.