SQO-da jarysqa bara jatqan jasóspirimder komandasy aıazda jolda qaldy
PETROPAVL. QazAqparat – Soltústik Qazaqstan oblysynda jarysqa shyqqan gir kóterýshilerdiń jasóspirimder komandasy jolda qalyp, polıtseıler aıazda tońǵan balalardy qutqardy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, Ýálıhanov aýdanynyń gir kóterýshi jasóspirimder komandasy jattyqtyrýshymen birge Táýelsizdik kúnine oraı Aqmola oblysynyń Şýchınsk qalasynda ótken jarysqa qatysqan. Komanda quramynda alty bala bolǵan. Úıge qaıtyp kele jatqanda kólik synyp, Taıynsha aýdanynyń aýmaǵynda Jańadáýir aýylynyń mańynda mashına jolda qalǵan.
Jattyqtyrýshy Ýálıhanov aýdanynyń polıtsııa bólimine habarlasyp kómek surady. Ol jaqtan bul oqıǵa týraly Chkalov aýylyndaǵy polselkelik polıtsııa bólimshesine aıtyldy. Bólimshe bastyǵy Aslan Dosmuqanov, onyń orynbasary men ýchaskelik ınspektordyń kómekshisi shuǵyl túrde oqıǵa ornyna jetip, máseleni sheshýge kómektesti.
«Biz kelsek balalar tońa bastapty. Sondyqtan olardy aldymen jyly jerge jetkizý kerek boldy. Keıin «GAZel» kóligin Chkalov aýylyna súırep apardyq. Júrgizýshi men jolaýshylarǵa ystyq tamaq uıymdastyrdyq. Synǵan mashınany tehnıkalyq qyzmet kórsetý ortalyǵyna jetkizdik», - deıdi polıtsııa podpolkovnıgi Aslan Dosmuqanov.
Jas sportshylardy alyp ketý úshin aýdan ortalyǵy Kishkenekólden basqa kólik keldi. Al balalar úılerine aman jetýi úshin patrýldik polıtsııa batalonynyń qyzmetkerleri olardyń aldynda júrip otyrdy.
