SQO-da jarty jylda 400-den astam adam koronavırýstan qaıtys boldy
SQO densaýlyq saqtaý basqarmasy basshysynyń mindetin atqarýshy Nurlan Aımanovtyń aıtýynsha, indet bastalǵaly oblysta 452 adam koronavırýstan qaıtys boldy. Kóz jumǵandardyń 95 %-y vaktsına almaǵan.
«Jeltoqsan aıynyń sońyna qaraı KVI-dan qaıtys bolǵandar sany kemidi. Aýrýshańdyqtyń tómendeýine baılanysty ınfektsııalyq statsıonarlarǵa jatatyndar sany da azaıdy. Qarashada juqpaly aýrýlar mekemelerinde 869 syrqatqa deıin jatqan kezder boldy. Táýligine 100 naýqastan túsip otyrdy. Sol kezderi kúnde 3-5 adam kóz jumatyn. Qazir 172 syrqat em alyp jatyr. Jansaqtaý bólimshesinde 21 naýqas bar, onyń aldynda 56 bolǵan. Qarqyndy terapııa palatalarynda da syrqattar sany eki ese kemidi. Sondyqtan koronavırýstan qaıtys bolatyndar sany da kemidi», - deıdi Nurlan Aımanov.
Mamannyń aıtýynsha, qazir táýligine 1-2 adam ómirden ozady. Bul elimizdiń basqa óńirlerimen salystyrǵanda – kóp. Jalpy «delta» shtamy paıda bolǵan jarty jyldyń ishinde oblysta 408 naýqas qaýipti ınfektsııadan qaıtys bolǵan.
«Nege SQO-da KVI-dan qaıtys bolǵandar sany kóp? Bizdiń óńirde egde jastaǵy turǵyndardyń úlesi joǵary. Olar qaýipti ınfektsııany juqtyrǵan kezde aýyr ótkeredi, ári kópshiligi áli kúnge deıin ekpe saldyrmaǵan.
Turǵyndar tarapynan ókpe qabynbasa da bizdi aýrýhanaǵa jatqyzbady degen shaǵymdar jıi túsedi. Men taǵy qaıtalap aıtamyn. Aýrýhanada qazir jatqandardyń barlyǵy – ózdiginen durys demala almaıtyndar. ıAǵnı statsıonarǵa jatqyzý úshin syrqatta aýrýdyń belgileri bolýy kerek. Ol – entigý, satýratsııanyń 93-ten tómen bolýy, otteginiń jetispeýshiligi jáne ıntoksıkatsııa belgileri. Árıne, sozylmaly aýrýynyń barlyǵy jáne vaktsına alǵan-almaǵany esepke alynady. Óıtkeni ekpe almaǵan jaǵdaıda syrqattyń jaǵdaıy kúrt nasharlaýy múmkin. Jedel járdem, mobıldi brıgada qyzmetkerleri nemese ýchaskelik dáriger osynyń barlyǵyn eskerip baryp qana statsıonarǵa joldama beredi», - deıdi medıtsınalyq qyzmetker.