SQO-da jarty jylda memlekettik qyzmet zańnamasyn buzýdyń 500-ge jýyq faktisi anyqtaldy

PETROPAVL. KAZINFORM – Soltústik Qazaqstan oblysynda memlekettik qyzmetshilerdiń quqyqtarynyń saqtalýyna qatysty júrgizilgen tekseristerdiń qorytyndysy shyqty.

Memlekettik qyzmet isteri agenttiginiń SQO boıynsha departamenti memlekettik qyzmet týraly zańnamanyń saqtalýyna qatysty jyl basynan beri 24 tekserý júrgizgen. Nátıjesinde zańdy buzýdyń 481 faktisi tirkeldi.

Departamenttiń bas mamany Dıana Salǵarınanyń aıtýynsha, tekserýler barysynda kadrlyq protsester, memlekettik qyzmetshilerdiń áleýmettik kepildikteri, tártiptik jaýapkershilik, sondaı-aq zańda belgilengen ózge de rásimder zerdelendi.

- Memlekettik ákimshilik laýazymdarǵa ornalasý boıynsha konkýrstarda talaptardyń buzylýy jıi kezdesedi. Osyndaı 60-tan astam fakti anyqtaldy. Onyń ishinde: kandıdat kelisim bergenimen áńgimelesý beınejazbasyn jarııalamaý; esselerdi konkýrstyq komıssııa músheleriniń baǵalamaýy; habarlandyrýda biliktilik talaptaryna sáıkes kelmeıtin mamandyqtardy kórsetý sııaqty jaıttar bar. 

Mundaı olqylyqtar konkýrstyń ashyqtyǵyn tómendetedi, - deıdi Dıana Salǵarına.
Іssapar shyǵyndaryn óteýde de kemshilikter anyqtaldy, 17 jaǵdaıda tólem ýaqytynda júrgizilmegen. Máselen, bir oblystyq memlekettik organda issapar shyǵyndary 18 kúnnen keıin ǵana ótelgen.

Jyl saıynǵy eńbek demalysyna qatysty da zańbuzýshylyqtar tirkeldi: 21 jaǵdaıda demalys aqysy keshiktirilip tólengen, al Petropavlda eki qyzmetshige uzaqtyǵy eki aptadan kem bolmaıtyn demalys múlde berilmegen.

- Memlekettik organdarda laýazymdyq nusqaýlyqtardy rásimdeý kezinde zańdy buzýdyń 40-tan astam deregi anyqtaldy. Olardyń ishinde: kúshin joıǵan normatıvtik aktilerdi kórsetý; talapqa saı kelmeıtin bilim deńgeıin engizý; bar bolsa da baǵynysty laýazymdardyń tizimin qospaý sekildi olqylyqtar bar.

Tekserý nátıjesinde memlekettik qyzmetshilerdiń belgilengen merzimde biliktiligin arttyrýǵa barmaýdyń 84 jaǵdaıy tirkeldi. Bul úzdiksiz kásibı damý qaǵıdatynyń jıi buzylatynyn kórsetedi, - deıdi departamenttiń bas mamany.

Buǵan deıin SQO-da 16 mıllıonǵa jýyq bıýdjet aqshasyn jymqyrǵan sheneýnik sottalǵanyn jazǵan edik.