SQO-da jarty jylda 22 myń aýyl turǵyny mobıldi medkeshen arqyly tekserildi
PETROPAVL. KAZINFORM – Soltústik Qazaqstan oblysynda shalǵaı jatqan aýyl turǵyndaryna jyljymaly medıtsınalyq keshender arqyly kásibı kómek kórsetilip keledi.
Búginde SQO-da mundaı mobıldi medıtsınalyq keshenderdiń sany onǵa jetken. Olardyń ekeýi KAMAZ avtokóligine, qalǵandary avtobýs negizinde jabdyqtalǵan. Bul keshender Qyzyljar, Esil, Aqqaıyń aýdandyq aýrýhanalarynda jumys isteıdi, al shilde aıynan bastap olardyń qataryna M.Jumabaev aýdandyq aýrýhanasy qosyldy.
Osy jyldyń alǵashqy jartyjyldyǵynda 22,1 myń adam mobıldi medkeshenniń kómegine júgindi. Bul — ótken jyldyń sáıkes kezeńimen salystyrǵanda 6,2 myń adamǵa artyq.
Dárigerler, sonyń ishinde tar beıindi mamandar shalǵaıdaǵy aýyldarǵa baryp tekseris ótkizedi. Nátıjesinde 1,5 myń turǵynnan ártúrli aýrý anyqtaldy. Onyń ishinde 329 adam, ıaǵnı tekserilgenderdiń 20% dıspanserlik esepke alyndy.
- Bul — aýrýdy erte anyqtap, der kezinde emdeýge múmkindik beredi. Alty aı ishinde jyljymaly keshender arqyly 7 myńǵa jýyq dıagnostıkalyq tekserý, 8,5 myńǵa jýyq zerthanalyq taldaý jasalsa, terapevt, pedıatr, kardıolog jáne basqa da dárigerler 10 myńnan astam qabyldaý júrgizip, keńes berdi, - deıdi mamandar.
Buǵan deıin úsh jyldyń ishinde elimizde 633 densaýlyq saqtaý nysany boı kótergenin jazǵan edik.
