SQO-da jarty mlrd teńgeniń astyǵyn órtep jibergen eki adam sottaldy

PETROPAVL. KAZINFORM – Petropavl qalalyq soty «Zolotaıa Nıva» eldi mekenindegi astyq qoımasyn jaǵyp jibergen eki adamǵa úkim shyǵardy. Olardyń bireýi sondaı-aq azamattyq nekedegi áıeliniń densaýlyǵyna aýyr zııan keltirgeni úshin de jaza aldy.

Soltústik Qazaqstan oblystyq sotynyń málimetinshe, sottalýshy P. 2020 jyldyń maýsymynda ózimen birge turatyn K.-ny balǵamen birneshe ret uryp, onyń densaýlyǵyna zııan keltirgen. Budan bólek P. ekinshi sottalýshy K.-men birge 2023 jyldyń mamyrynda «Zolotaıa Nıva» aýylynda ornalasqan bıdaı saqtaıtyn qoımaǵa ot qoıyp, jaǵyp jibergen. Saldarynan astyq qoımasynyń ıesine 495 mln teńge shamasynda shyǵyn keldi.

Qylmystyq isti Petropavl qalalyq soty qarady. Sottalýshylardyń kinási jábirlenýshilerdiń, kýágerlerdiń, sarapshylardyń jáne basqa mamandardyń qorytyndylarymen tolyq dáleldendi.

Sot K.-nyń kishkentaı balasynyń baryn onyń qylmystyq jaýapkershiligi men jazasyn jeńildetetin mán-jaılar retinde qarady. Al P.-nyń jaýapkershiligin jeńildetetin mán-jaı anyqtalǵan joq.

K. men P.-nyń qylmysqa aldyn ala sóz baılasý jáne top bolyp barýyn, sondaı-aq P.-nyń qylmysty alkogoldi mas kúıde jasaýyn olardyń jazasyn aýyrlatatyn mán-jaı retinde esepke aldy.

Sottyń úkimimen K. 6 jylǵa, P. 7 jyl 6 aıǵa bas bostandyǵynan aıyryldy. Olar jazasyn qylmystyq-atqarý júıesiniń ortasha qaýipsizdik mekemesinde atqarady.

Jábirlenýshiniń azamattyq talaby tolyq kólemde qanaǵattandyryldy.

Sot úkimi zańdy kúshine engen joq.

Buǵan deıin SQO-da aýdandardyń biriniń ákim orynbasary men bólim basshysy 10 mln teńge para aldy degen kúdikke ilingenin aıtqan edik.