SQO-da jaryqsyz otyrǵan eldi mekender sany 120-ǵa jetti
Soltústik Qazaqstan oblysynda aýa raıynyń buzylýyna baılanysty elektr qýatynsyz qalǵan eldi mekenderdiń sany 120-ǵa jetti. Qazir on aýdanda apattyq brıgadalar jumys istep jatyr, dep habarlaıdy Kazinform.
Buǵan deıin SQO-daǵy 9 aýdanda, 93 eldi mekende jaryqtyń óship qalǵanyn aıtqan edik.
Eldi mekenderde elektr qýaty aýa raıynyń buzylýyna baılanysty sóngen. Óńirde Atlant tsıklony oıran salyp, saldarynan qar aralas jańbyr jaýdy, qatty jel turǵan.
SQO energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Vladıslav Lýkınniń aıtýynsha, qazirgi aqparat boıynsha 10 aýdannyń 120 eldi mekeninde jaryq óshken. Bul – 13 285 abonent.
«Apat ornynda «Sevkazenergo» AQ jáne «Kókshetaý-Energo» JShS-gi – eki kompanııanyń 92 brıgadasy, 195 tehnıkasy, 448 mamany jumys istep jatyr. Eshkim qol qýsyryp otyrǵan joq», - deıdi Vladıslav Lýkın.
