SQO-da jańajyldyq shyrshalar ekinshi ret kádege jarap jatyr
PETROPAVL. KAZINFORM — Petropavlda meıramda qoldanylǵan shyrshalar jabaıy janýarlarǵa azyq bolady.
Bul is-sharany jergilikti volonterler jaýapty mekemelerdiń qoldaýymen «Taza Qazaqstan» aktsııasy aıasynda uıymdastyrdy.
— Jańa jyl merekesinen keıin Petropavl boıynsha paıdalanylǵan shyrshalar jınalyp, qala mańyndaǵy Kýıbyshev orman sharýashylyǵyna ákelinip jatyr. Buǵan deıin aktsııa týraly turǵyndardy habardar ettik. Olar shyrshany 25 qańtarǵa deıin qoqys jáshiginiń qasyna shyǵaryp qoıa alady. Keıin júk kóligi alyp ketedi. Al 25 qańtardan keıin konteınerge tastaıtyn bolsa, bul úshin aıyppul tóleıdi, — deıdi Petropavl jastar resýrstyq ortalyǵynyń jetekshisi Damır Abdın.
Ormanshylar da bul bastamany qup aldy. Shyrshalar jabaıy janýarlarǵa azyq retinde, tósem retinde qoldanylady.
— Aǵashtardy mekeme aýmaǵynda dińinen butaqtaryn bólip daıyndaımyz, keıin orman ishine, jemdeý alańdaryna aparamyz. Aǵashtyń qylqany janýarlarǵa qajet dárýmenge baı. Sondyqtan qazirgideı dalada azyq azaıǵan shaqta olarǵa bul jaqsy qorek. Budan bólek qazir jazda daıyndaǵan qaıyń sypyrǵyshtaryn da berip jatyrmyz, — deıdi «Qyzyljar orman sharýashylyǵy» KMM ormanshysy Dmıtrıı Býtenko.
Byltyr osy ýaqytta elikter azyq izdep eldi mekender ishine kirip ketken edi. Oǵan, mamandardyń aıtýynsha, qalyń qar sebep boldy. Ári birneshe ret qys ortasynda jańbyr jaýyp, qatyryp, janýarlar tebindeı almaı ashtyqqa uryndy.
— Eki jyl qatarynan Reseıden kóp elik aýyp keldi. Jabaıy janýarlardyń mıgratsııalyq joly bar. Olar shamamen on jylda osylaısha aýyp otyrady. Onyń bir sebebi — kóbeıý úshin jemshóp jáne jaıly jer izdeý. Bıyl jaǵdaı ázirge jaqsy, — deıdi Dmıtrıı Býtenko.
Buǵan deıin SQO-da 99 jasqa kelgen maıdanger Vasılıı Makıenkoǵa qurmet kórsetilgenin jazdyq.