SQO-da janarmaı tasıtyn kólik jol jıegindegi jyraǵa túsip ketti
PETROPAVL. QazAqparat – Soltústik Qazaqstan oblysynda patrýldi polıtseıler men «Kazahavtodor» JShS qyzmetkerleri jol jıegindegi jyraǵa túsip ketken janarmaı tasıtyn kólikti shyǵaryp aldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Qostanaı turǵyny Igor Moısov keshke janarmaı tasıtyn «KamAZ» kóligimen Qostanaıdan Ombyǵa qaraı jolǵa shyqqan. Presnovka eldimekeniniń mańynda Mamlıýtka-Qostanaı jolynda júk kóligi jyraǵa túsip ketedi. Tsısternasy bos bolǵan.
Júrgizýshi aman-esen, ol birden «102» arnasyna qońyraý shaldy. Oqıǵa ornyna patrýldik polıtsııa batalonynyń ekıpajy jetip, jaǵdaıdy anyqtaǵannan keıin «Kazahavtodor» JShS oblystyq fılıalynyń N67 jol paıdalaný ýchaskesiniń bastyǵy Vadım Bıkınnen kómek suraıdy.
Kóp uzamaı DEÝ qyzmetkeri Vladımır Kreıs traktormen kómekke kelip, júk kóligi saparyn jalǵastyrdy. Patrýldik polıtseıler osy ýaqytta qozǵalys qaýipsizdigin qamtamasyz etti.
«Kazahavtodor» JShS jumysshylary men aýyldyq jerlerdegi JShS basshylarynyń kómegi orasan zor. Batalon qyzmetkerleri jolda qalǵan kólikti ózdiginen shyǵara almaıtyn jaǵdaıda bolsa, birden habarlasady. Olar boranǵa nemese jańbyrǵa qaramastan, kez-kelgen ýaqytta kómekke keledi. Tártip saqshylary turǵyndardyń kórsetken kómekterin joǵary baǵalaıdy, ıaǵnı bul quqyqtyq tártip pen qaýipsizdikti qamtamasyz etýde maqsatymyzdyń bir ekendigin kórsetedi», - deıdi SQO PD Patrýldik polıtsııa batalonynyń komandıri Erlan Mádıev.
Qostanaı qalasynyń turǵyny Igor Moısov kelesi kúni SQO polıtsııasy patrýldik polıtseılerdiń jolda kómektesken jedel áreketterine rızashylyǵyn bildirip, qońyraý shaldy.
