SQO-da jańadan ekinshi hokkeı korty salynyp, paıdalanýǵa berildi
PETROPAVL. QazAqparat – Soltústik Qazaqstan oblysy Mamlıýtka qalasynda «Tarlan» atty jańa hokkeı korty ashyldy, dep habarlaıdy QazAqparat tilshisi.
Buǵan deıin hokkeı korty Ǵabıt Músirepov atyndaǵy aýdannyń ortalyǵy Novoıshımkada ashyldy.
Endi dál osynda muz aıdyny Mamlıýt aýdanynyń ortalyǵynda ashylyp otyr.
SQO ákimi baspasóz qyzmetiniń málimetinshe, óńirde byltyr 5 hokkeı kortynyń qurylysy bastaldy. Eki sport nysany iske qosyldy, qalǵandary qańtardyń aıaǵyna deıin ashylady.
Sport nysanyn salýǵa bıýdjetten 106 mln teńge qarajat bólindi.
«Mamlıýt aýdanynyń hokkeıden qurama komandasy bar. Buǵan deıin ashyq muz alańynda ǵana jattyǵyp, aýa raıyna táýeldi bolyp keldi. Jańa hokkeı kortynda jergilikti komanda jattyǵyp, balalar sportyn da damytýdy josparlap otyrmyz. Oǵan qosa turǵyndar da konkımen syrǵanaı alady. Aýdandyq sport jarystaryn da osy kortta ótkizemiz», - deıdi Mamlıýt aýdandyq sport bóliminiń basshysy Dýman Serǵalıev.
2021 jyly taǵy 7 hokkeı kortynyń qurylysy bastalady.
«2020 jyldyń qorytyndysy boıynsha sport salasyna bólingen qarjylandyrýdy 18%-ke arttyrdyq. Bul qarajatqa jańa sport nysandary turǵyzylyp jatyr. 6 dene shynyqtyrý-saýyqtyrý keshenininiń qurylysy bastalyp, bireýin qoldanysqa berip úlgerdik. Bıyl Tımırıazev aýdanynda da osyndaı keshen salynady. Mamlıýt aýdanynda budan basqa jańa, zamanaýı sport keshenin turǵyzbaqpyz», - deıdi Qumar Aqsaqalov.
