SQO-da jańa jyldan mekteptegi ystyq tamaq baǵasy óse me
PETROPAVL. KAZINFORM – Jyldyń aıaqtalýyna sanaýly kúnder qalsa da, Soltústik Qazaqstan oblysynda mektepterdegi ystyq tamaqtyń jańa baǵasy bekitilgen joq.
10 qańtardan bastap mektepterdegi tamaqtaný jańa standart boıynsha uıymdastyrylýy tıis. Alaıda mektep ashanalarynda jumys isteıtin kásipkerler áli kúnge deıin ystyq tamaq baǵasy kóterile me, joq pa — belgisiz ekenin aıtady.
Bul másele SQO kásipkerler palatasyndaǵy kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl keńesiniń otyrysynda kóterildi.
Bul máseleniń qaıta qaralýyna «Bólshek saýda jáne qoǵamdyq tamaqtaný qaýymdastyǵy» respýblıkalyq birlestiginiń resmı ótinishi sebep bolǵan. Bıyl 1 qyrkúıekten bastap mektepterde jańartylǵan tamaqtaný standarty engizildi. Ol oqýshylar ratsıonyn jaqsartyp, et, jemis-jıdek mólsherin arttyrýdy, kúndelikti ystyq taǵamnyń bolýyn talap etedi. Qosymsha qarajat bólinbegendikten SQO bul standartty engizýdi 2026 jylǵa qaldyrǵan edi.
SQO kásipkerler palatasynyń málimetinshe, jańa mázirdi ázirleý jáne ystyq túski as qunyn esepteý úshin óńirde kásipkerler, SES, bilim jáne densaýlyq saqtaý basqarmalary ókilderinen turatyn arnaıy jumys toby quryldy. Kásipkerlerdiń aıtýynsha, jańa talaptarǵa saı bolý úshin bastaýysh synyp oqýshylaryna arnalǵan túski as baǵasy eń kemi 747 teńge bolýy tıis. Alaıda bul baǵa áli kúnge deıin resmı túrde bekitilmeı otyr.
- SQO-da baǵany barynsha tómendetýge tyrystyq. Basqa oblystarda bul másele tolyq sheshildi. Mysaly, ShQO-da 804 teńge bolyp bekitildi. Respýblıka boıynsha ortasha baǵa 800 teńgeden bastalady. Buryn mázirdi botqa esebinen arzandatýǵa bolatyn edi, al jańa standart boıynsha etti taǵamdar kún saıyn berilýi tıis. Eger SQO-da túski as baǵasyn kótermese, 10 qańtardan bastap jańa standartty engizý múmkin bolmaıdy, – dedi Bólshek saýda jáne qoǵamdyq tamaqtaný qaýymdastyǵynyń vıtse-prezıdenti Marına Lapteva.
Bilim basqarmasy basshysynyń orynbasary Dınara Úkenovanyń aıtýynsha, jańa standartty engizýge qajetti qosymsha bıýdjettik ótinim qoǵamdyq keńes pen turaqty komıssııada aldyn ala maquldanǵan. Endi bul ótinimdi oblystyq máslıhatta bekitý ǵana qaldy.
Jańa mázir, jańa baǵa jáne jańartylǵan kelisimsharttar 2026 jylǵy 10 qańtardan bastap kúshine enýi tıis. Eger jyl sońyna deıin bıýdjet bekitilmese jáne jańa baǵa bilim basqarmasynyń buıryǵymen resmı túrde jarııalanbasa, SQO-da jańa standartty ýaqytynda engizý taǵy keıinge shegerilýi múmkin.
Sondyqtan keńes bilim basqarmasyna baǵa men mázirdi bekitý protsesin jedeldetýdi, kásipkerlermen kelisimsharttardy ýaqytyly rásimdeýdi usyndy. Sonymen qatar másele boıynsha oblys ákimine aqparat beriletin boldy. Prokýratýra kásipkerler palatasymen birge bul máseleni baqylaýyna aldy.
Esterińizge salaıyq, mektep ashanasynda tyıym salynatyn taǵam tizimi jańarǵan edi.