SQO-da jańa jyldan bastap mektep kúzetine jasy elýge jetpegen adamdar ǵana alynady
PETROPAVL. KAZINFORM — Soltústik Qazaqstan oblysy bilim berý mekemelerindegi kúzet qyzmetkerleriniń 76% — jasy elýden asqan.
Óńirdegi mektepter men balabaqshalardy negizinen fızıkalyq daıyndyǵy tómen jasy úlken erler men áıelder kúzetedi.
Bul máseleni SQO Polıtsııa departamenti bastyǵy Aıdyn Qabduldınov kóterdi.
— Bilim berý nysandaryn qorǵaýmen «jasy kelgen» kadrlar, burynǵy vahter áıelder men er adamdar aınalysady. Olar eńbek sharttaryn qaıta jasasý arqyly kúzet qurylymdarynyń quramyna kirgen. Alaıda naqty qaýip tóngen jaǵdaıda, ózderiniń fızıkalyq múmkindikteri men daıarlyǵynyń joqtyǵyna baılanysty shabýyldy nemese terrorıstik aktini boldyrmaý úshin tıisti sharalardy qabyldaı almaıdy. Bul másele buǵan deıin de qaraldy, oǵan qatysty naqty sheshim qabyldaý qajet, — deıdi Aıdyn Qabduldınov.
SQO Bilim basqarmasynyń málimetinshe, Kúzet qyzmeti týraly zańda kúzetshilerdiń jasyna qatysty shekteý joq. Jeke kúzet uıymynyń kúzetshisi laýazymyna 19 jastan kem emes jáne kúzetshiniń arnaıy daıarlyǵynan ótken Qazaqstan Respýblıkasynyń azamattary qabyldanýy múmkin.
Desek te, bıyl 15 mamyrda Oqý-aǵartý mınıstriniń «Bilim berý uıymdarynda kúzet qyzmetterin satyp alý jónindegi úlgilik konkýrstyq qujattamany bekitý týraly» buıryqqa qol qoıdy. Endi kúzetshi laýazymyna 25-ten 50 jasqa deıingi adamdar ǵana qabyldanady.
— Shart bir jylǵa jasalatyndyqtan, jeltoqsan aıyna deıin sharttyq mindettemeler aıaqtalǵanyn kútemiz. Keıin jańa buıryqqa sáıkes júzege asyrylatyn bolady, — delingen basqarmanyń resmı jaýabynda.
Basqarmanyń málimetinshe, oblysta 437 mektep bar, onyń terrorıstik turǵyda osal 200-i 1-topqa, qalǵan 86-sy 2-shi topqa jatady. 2-shi toptyń obektileri mindetti túrde mamandandyrylǵan kúzetpen qamtamasyz etiledi. Búgingi tańda mamandandyrylǵan kúzet talaptarǵa sáıkes 2-shi toptaǵy nysandardyń barlyǵynda bar. Olarda 431 adam eńbek etedi, osy kúzet qyzmetkerleriniń 76%, ıaǵnı 328-iniń jasy 50-den asqan.
Mamandardyń aıtýynsha, bul jumysqa jastar kele bermeıdi, óıtkeni kúzetshilerdiń jalaqysy tómen, shamamen 100-120 myń teńge alady.
Buǵan deıin 2028 jylǵa deıin mektepterde 1000 stomatologııalyq kabınet ashylatyndyǵyn jazǵan edik.