SQO-da Jańa jyl meıramyna úılerin bezendirgen turǵyndar kópshilikti tańǵaldyryp jatyr
PETROPAVL. KAZINFORM – Soltústik Qazaqstan oblysynda Jańa jyl merekesine oraı úıdi ásemdeý trendke aınaldy.
Muny óńirdegi Taıynsha aýdany bastap bergendeı. Áleýmettik jelide túrli túske malynyp, jarqyraǵan úılerdiń rolıgi tarady. Keı oqyrmandar ony amerıkalyq fılmderdegi Rojdestvo meıramy qarsańynda bezendirilgen úılerge uqsatty.
Taıynsha qalasynyń turǵyny Artem Shlıaınıng bıyl alǵash ret baspanasyn bezendirip otyr. Ol osy maqsatqa shamamen 70 myń teńge jumsaǵan.
- Kósheden ótkender toqtap, sýretke túsip jatady. Toqtap, qarap, qyzyqtap turatyndar bar. Keıbiri kelip, merekelik kóńil kúı syılaǵanymyz úshin alǵys aıtady. Balalar da rıza. Úıdi bezendirýge úsh apta ýaqytym ketti. Keı kúnderi túngi saǵat 2-3-ke deıin júrgen kezderim boldy. Nátıjesi kóńilden shyqty, - deıdi qala turǵyny.
Al Serik Hamıtov Taıynshada 10 jylǵa jýyq turyp jatyr.
- Osy ýchaskeni alǵan kezde kishkentaı ǵana shyrsha bolatyn, alyp tastaǵym keldi, biraq obalsynyp, úıdi jyljytyp saldym. Keıin sol shyrshany jylda bezendiretin boldyq. Biraq qazir oǵan boıym jetpeıdi. Úıdi biz ǵana emes, kórshiler, búkil kóshe turǵyndary jylda bezendiredi. Byltyr, tipti, ákimdik baıqaý uıymdastyryp, birinshi oryndy jeńip aldyq, - deıdi Serik Hamıtov.
Al Qyzyljar aýdanyndaǵy Metlıshıno eldi mekeni estafetany jalǵastyrǵandaı. Gırlıandamen ásemdelgen úılerdiń biri muz saraıyna uqsasa, endi biri baspanasyn ǵana emes, búkil aýlasyn bezendirgen.
Ǵ.Músirepov atyndaǵy aýdan ortalyǵy Novoıshımka eldi mekeni de bul trendten qalmady.
Buǵan deıin jańajyldyq erteńgilikterge 20 jylǵa jýyq patrıottyq kıim tikken SQO turǵyny týraly jazǵan edik.