SQO-da jańa jyl qarsańynda arnaıy qyzmetterdiń mobıldi toptary jumys istep jatyr

PETROPAVL. KAZINFORM – Soltústik Qazaqstan oblysynda jańajyldyq merekeler ótkiziletin 685 oryn tekserilip, 485 olqylyq anyqtaldy. Onyń basym bóligi joıyldy.

SQO Tótenshe jaǵdaılar departamenti mamandary meıram aldynda saqtyq sharalaryn eske saldy. Byltyr Beskól aýylynda 27 jeltoqsanda alańdaǵy shyrsha janyp ketti. Bıyl Shymkentte osyndaı oqıǵa qaıtalandy.

— Іs-sharalar ótkiziletin jerlerde evakýatsııalaý joldarynyń jaı-kúıine, alǵashqy órt sóndirý quraldarynyń bolýyna, shyrshalardy qaýipsiz ornatý, jaramdy elektr gırlıandalaryn qoldaný, shyrshany evakýatsııalaýǵa kedergi keltirmeıtin oryndarda ornatýǵa erekshe nazar aýdaryldy. Sondaı-aq qyzmet kórsetýshi personaldyń órt bolǵan jaǵdaıda áreket etý daǵdylarynyń bolýy tekserildi, — deıdi SQO TJD memlekettik órt baqylaý basqarmasynyń bastyǵy Aslan Ahmetjanov.

SQO-da «Pırotehnıka» jedel-profılaktıkalyq is sharasy bastalǵannan beri 31 adam ákimshilik jaýapkershilikke tartyldy. Olarǵa 1 mln 384 myń teńge aıyppul salyndy. Zańsyz aınalymnan 1200 astam pırotehnıkalyq buıym alyndy.

— Jańa jyl meıramy qarsańynda pırotehnıkalyq ónimge suranys artady. Alaıda onyń qaýip kózi ekenin umytpaǵan jón. Satyp alǵan feıerverkterdiń lıtsenzııasy bolýy tıis, ári jasalǵan merzimine de qaraý kerek. Otshashýlardy ǵımarattardan 50 m qashyqta jáne aǵash baýyrynan alys atý kerek. Al jeldi kúni pırotehnıkany qoldanýǵa tyıym salynǵan, — deıdi Aslan Ahmetjanov.

Qazir SQO-da TJD-niń ǵana 69 mobtldi toby qurylyp, jumys istep jatyr.

Buǵan deıin SQO-da kóligine jalǵan nómir taqqan er adam sottalǵanyn jazǵan edik.