SQO-da jańa oqý jyly bastalǵaly 84 oqýshydan koronavırýs anyqtaldy
SQO-da óńirdegi koronavırýsqa qatysty ahýalǵa baılanysty óńirlik kommýnıkatsııalar qyzmetinde kezekti brıfıng ótti.
SQO-nyń bas sanıtar dárigeri Áset Jumataevtyń aıtýynsha, jańa oqý jyly bastalǵaly 19 muǵalim koronavırýspen aýyrǵan, onyń beseýi shtattyq rejımde jumys istegen. Mektep jasyndaǵy balalardyń 84-i juqtyrǵan, olardyń 22-si dástúrli formatta oqyǵan.
«Oqýshylardyń barlyǵy koronavırýsty kanıkýl ýaqytynda juqtyrǵan. Mektepke qatysy joq. Qazir óńirde 22 synyp karantınge jabyldy, mektepter arasynda karantınge jabylǵany joq. Kolledjderde eki top qazir qashyqtan oqýǵa aýystyryldy», - deıdi Áset Jumataev.
Balabaqsha tárbıelenýshileri arasynda da vırýsty juqtyrǵandar bar. Osyndaı 4 jaǵdaı anyqtalyp otyr. Ótken eki aptamen salystyrǵanda búldirshinder arasynda aýrý 8 jaǵdaıǵa tómendegen.
SQO densaýlyq saqtaý basqarmasy bastyǵynyń orynbasary Qumar Kúsemisovtyń aıtýynsha, qazir óńirde qaýipti ınfektsııa juqtyrǵan 165 bala aýyryp jatyr. Onyń 25-i statsıonarǵa jatqyzylǵan, bir balanyń hali nashar.