SQO-da jańa oqý jylynda eki jańa mektep paıdalanýǵa beriledi
PETROPAVL. KAZINFORM – Soltústik Qazaqstan oblysyndaǵy Eńbek aýylynda jáne Petropavldaǵy «Bereke» shaǵyn aýdanynda alǵashqy qońyraý jańa mektepte soǵylmaq.
SQO bilim basqarmasynyń málimetinshe, «Jaıly mektep» ulttyq jobasy aıasynda «Bereke» shaǵyn aýdanynda 600 oryndyq mekteptiń qurylysy júrip jatyr. Jobanyń jalpy quny – 4,9 mlrd teńge. Qazirgi ýaqytta qurylys-montaj jumystarynyń 85% oryndalǵan.
– Barlyq qajetti qurylys materıaly satyp alynyp, qurylys nysanynda daıyn tur. Syrtqy ınjenerlik jeliler qosylǵan. 1 tamyzdaǵy jaǵdaı boıynsha «Bereke» shaǵyn aýdanynda salynyp jatqan jańa mektepke 542 ótinish túcti. Sonyń 116-sy qazaq tilinde bilim alýǵa, 402 ótinish oryssha oqýǵa jáne mektepaldy daıarlyq synybyna 24 ótinish qabyldandy. Jańa mektepke, sondaı-aq, №24 orta mektepten 209 oqýshy, №25 orta mektepten 104 oqýshy, №26 orta mektepten 200 oqýshy jáne №32, №20, №17, №21 jáne qalalyq klassıkalyq gımnazııadan 20 shaqty oqýshy aýysyp keledi, - deıdi SQO bilim basqarmasynyń baspasóz hatshysy Ásel Orazbaeva.
Bul bilim ordasynyń ereksheligi – ol jalpy bilim beretin mektep bolǵanymen, zamanaýı jabdyqtalǵan zerthanalary, ınformatıka, robototehnıka jáne ózge de jańǵyrtylǵan pán kabınetteri bar.
Esil aýdany Eńbek aýylynda salynyp jatqan bir qabatty shaǵyn komplektili mektep 50 balaǵa shaqtalǵan. Qasynda 10 búldirshinge arnalǵan shaǵyn ortalyq bar. Bul jergilikti kásipker Qaıyrbek Qojasovtyń aýyldastaryna jasaǵan syıy. Oqý ordasy 1 qyrkúıekte esigin aıqara ashpaq.
Jańa mekteptiń aýdany 834 m². Buǵan deıin aýdan ortalyǵy ıAvlenka men kórshi Pokrovka eldi mekenine baryp oqyǵan balalar úshin munda bar jaǵdaı jasalǵan: 6 oqý kabıneti, sport zaly, ashanasy, medıtsınalyq pýnkti bar.
Mektepte balalar qazaqsha bilim alady.
Jalpy bıyl SQO-da 74 myńǵa jýyq bala mektepte oqymaq. Jańa oqý jylynda 1-synypqa 6379 búldirshin qabyldanady dep josparlanǵan, búgingi kúni ata-analardan qazaq synybyna 1700-ge jýyq ótinish tústi.
Buǵan deıin Almaty oblysynda bıyl 11 jańa mektep paıdalanýǵa beriletinin jazǵan edik.
Esterińizge salaıyq, SQO-da byltyr 14 mektep jabylsa, bıyl taǵy jeteýi jumysyn toqtatýy múmkin ekenin jazǵan edik.