SQO-da jańa elevatordy iske qosty (FOTO)
PETROPAVL. QazAqparat - Ǵ.Músirepov atyndaǵy aýdanǵa jasaǵan jumys saparynyń barysynda Erik Sultanov «Aq Nan Sever» JShS elevatorynyń iske qosylý rásimine qatysty.
Jańǵyrtýdan keıin ShÓK-nyń qýattylyǵy 68 myń tonnany qurady. Bul týraly aımaq basshysynyń baspasóz qyzmetinen habarlaıdy.
Erik Sultanov jańa kásiporyndardy ashý aımaqtyń áleýmettik-ekonomıkalyq damýy úshin úlken máni bar ekenin atap ótti. Bul, eń aldymen - jańa jumys oryndaryn qurý. Elevatorda aımaqtyń 26 turǵyny jumysqa turdy.
«Kompanııanyń tek Qazaqstan aımaqtary boıynsha ǵana emes, Qytaı naryqtaryna taýarlar eksportyn retke keltirýi mańyzdy. Olar joldy birinshi bolyp ashty. Bul - bolashaǵy bar baǵyt», - dedi Erik Hamzauly.
Saltanatty iske qosý rásiminen keıin oblys ákimi elevatordyń jabdyqtaryn qarap shyqty.
Sol kúni aımaq basshysy Novoıshımskoe aýylyndaǵy Ortalyq aýdandyq aýrýhanaǵa bardy. Aýrýhana 1979 jyly salynǵan, kúrdeli jóndeýdi talap etedi. Búginde «Jumyspen qamtýdyń dol kartasy-2020» baǵdarlamasynyń aıasynda jóndeý jumystaryna 73 mln. teńge bólindi. Aýrýhananyń bas dárigeriniń m.a. Natalıa Karpova oblys ákimine bul máseleni jedel sheshkeni úshin alǵysyn aıtty.
Erik Sultanov sondaı-aq aýrýhananyń jyljymaly medıtsınalyq kesheni men reanımobılder bar kólik parkin qarap shyqty.
Odan keıin oblys ákimi Abylaıhan, 16 mekenjaıyna bardy. Qazirgi kezde bul turǵyn úı páterleri pesh arqyly jylytylyp, shatyry jóndeýdi talap etip otyr. Erik Sultanov qazandyqty salýǵa jarym-jartylaı qarjylyq kómek kórsetýdi ýáde etti. Shatyr aımaqtardy damytý baǵdarlamasynyń aıasynda jóndeledi.
Sondaı-aq aımaq basshysy «Novoıshım dıirmen kombınaty» JShS dıirmen keshenine bardy. Ol óz jumysyn bıylǵy jyldyń naýryzynda qalpyna keltirdi. Munda undy 2 kelilik paketterge salyp oraý jelisi ornatyldy. Dıirmen kesheniniń qýattylyǵy táýligine shamamen 120 tonnany qurap otyr. Shyǵarylǵan ónim Soltústik Qazaqstan oblysynyń bazarlaryna jetkiziledi.
