SQO-da Jambyldyń 175 jyldyǵyna oraı biregeı mýral ornatylmaq

PETROPAVL. QazAqparat – Soltústik Qazaqstan oblysynda Jambyl Jabaevtyń 175 jyldyq mereıtoıyna oraı birqatar is-sharalar josparlanǵan. Sonyń biri jyr alyby – Jambyldyń beınesi bar mýral ornatý, dep habarlaıdy QazAqparat tilshisi.

Jambyl Jabaevtyń 175 jyldyq mereıtoıyna oraı Petropavlda jyraý, aqyn, qazaq halyq poezııasynyń kórnekti ókiliniń músinine gúl qoıý rásimi ótti. Saltanatty is-sharaǵa oblys ákiminiń orynbasary Ǵanı Nyǵymetov, Petropavl qalasynyń ákimi Bolat Jumabekov, ardagerler qaýymy, ǵylymı jáne shyǵarmashylyq zııaly qaýym ókilderi qatysty.

Oblys ákiminiń orynbasary Ǵanı Nyǵymetov mereıtoı jyly aıasynda óńirde aqynnyń shyǵarmashylyq murasyn nasıhattaý úshin túrli formattaǵy is-sharalar ótetinin aıtty.

«SQO-da Jambyl Jabaevtyń esimi berilgen bir aýdan, 3 aýyl jáne 44 kóshe bar. Bıyl jyr alybynyń mereıtoıyna oraı Jambyl Jabaev atyndaǵy kóshelerdi, eldi mekenderdiń aýmaqtaryn abattandyrý jumystary júrgiziledi. Sondaı-aq, Jambyl kóshesinde ornalasqan turǵyn úıdiń biriniń qasbetine keramıkalyq tósemnen mýral ornatý josparda bar», - dedi Ǵanı Nyǵymetov.

Byltyr uly Abaıdyń 175 jyldyq mereıtoıyna oraı oblys ortalyǵynda uly aqynnyń beınesi bar sáýletti mýral ornatyldy. Abaı kóshesinde turǵan alyp panno janynan shaǵyn saıabaq ta ashyldy. Kompozıtsııanyń ereksheligi - bul elimizdegi keramıkalyq taqtaıshalardan jasalǵan ázirge jalǵyz mýral.