SQO-da jalǵan «antıvırýs» arqyly aqsha urlaý kóbeıdi
PETROPAVL. KAZINFORM – Soltústik Qazaqstan oblysynda kıberqylmystyń jańa túri tirkelip, osy shema boıynsha jasalǵan 3 ınternet-qylmys anyqtaldy.
SQO Polıtsııa departamenti baspasóz qyzmetiniń málimetinshe, turǵyndarǵa «banktiń qaýipsizdik qyzmetinen», «IT-maman» bolyp jáne basqa da uıymdardan habarlasyp, «senimdi antıvırýs» ornatýǵa kóndiredi. Bul baǵdarlama bank qosymshalaryn qorǵaıdy dep sendiredi. Keıin quryqtaryna túsken adamǵa silteme jiberilip, ol qurylǵysyna zııandy baǵdarlamany júktep alady. Saldarynan alaıaqtar jábirlenýshiniń bank qosymshasyna qashyqtan qol jetkizip, onyń shottaryndaǵy qarajatty tolyq sheship alady.
Jalpy, eki aı ishinde SQO-da 110 ınternet-alaıaqtyq faktisi tirkeldi. Bul ótken jyldyń osy kezeńimen salystyrǵanda 9% az. Onyń 52-si «bankten qońyraý shalý» shemasy boıynsha jasalǵan.
Polıtseıler azamattardy beıtanys adamdardan túsken qońyraýlarǵa senbeýge jáne olar jibergen kúmándi siltemelerge ótpeýge shaqyrady. Sondaı-aq mamandar qosymshalardy tek resmı derekkózderden júkteýdiń mańyzdylyǵyn eskertedi.
Buǵan deıin 2025 jyly alaıaqtar qazaqstandyqtarǵa 84,5 mln ret qońyraý shalǵanyn jazǵan edik.