SQO-da jaǵdaı turaqty jáne baqylaýǵa alynǵan – Qumar Aqsaqalov
SQO ákimi Qumar Aqsaqalov sóziniń basynda búgin elimizde jalpyulttyq aza tutý kúni ekenin eske salyp, qaıtys bolǵan azamattardyń otbasylaryna kóńil aıtty.
Óńir basshysynyń aıtýynsha, qazir oblysta ahýal turaqty. Óńirde osy kúnderi zardap shekkender bolǵan joq. Múlikke zııan kelgen joq.
«Jaǵdaıǵa túsinistikpen qaraǵan oblys turǵyndaryna alǵys aıtamyn. Tótenshe jaǵdaı rejıminde ómir súrip jatqanymyzǵa bes kún boldy. Óńirge kireberisterge beketter qoıyldy. Memlekettik organdar men mańyzdy nysandar shtattyq rejımde jumys istep jatyr. Azyq-túlikpen qamtamasyz etildi», - dedi Qumar Aqsaqalov.
Oblys ákiminiń aıtýynsha, SQO-da gaz baǵasy eldiń basqa óńirlerine qaraǵanda qymbat degen aqparat tarap jatyr. Bul shyndyqqa janaspaıdy. Monopolııaǵa qarsy agenttik tekserip, nátıjesinde SQO, Aqmola, Almaty, Qostanaı, Qaraǵandy jáne Pavlodar oblystarynda avtogazǵa baǵanyń birdeı ekenin anyqtady.
«Osy kúnderi elimiz boıynsha ınternet belgili bir ýaqytqa ǵana berilip turdy. Kún saıyn onyń ýaqyty uzartylady. Oblysta bankomattarǵa aqsha salý jumystary júrgizildi, negizgi bankomattarda aqsha bar. Qaladaǵy birqatar sýpermarketter arnaıy jeli arqyly aqshasyz tólemderdi qabyldap keledi. Halyq banktiń oblystaǵy bólimsheleri óz jumysyn bastady. Bankterge arnaıy kúzet qoıyldy.
Memleket basshysy Qasym-Jomart Toqaev óz Úndeýinde jaǵdaı turaqty óńirlerde tótenshe jaǵdaı kezeń-kezeńimen alynady dep aıtty. Bizdiń oblysta alǵashqylardyń biri bolyp tótenshe jaǵdaı alynady dep kútilýde», - dedi SQO ákimi.
Buǵan deıin SQO komendanty atqarylǵan jumys jaıynda aqparat bergen edi. Marat Tólebaevtyń aıtýynsha, tótenshe jaǵdaı engizilgeli polıtsııa organdaryna barlyǵy 255 adam jetkizildi, onyń ishinde 72 adam rejımdi buzǵany úshin ustaldy.
