SQO-da jaǵajaıǵa barǵan 200-den astam adam jazalandy
PETROPAVL. QazAqparat – Soltústik Qazaqstan oblysynda «Nur Otan» partııasynyń aımaqtyq baqylaý komıssııasynyń músheleri men volonterler qoǵamdyq reıd uıymdastyrdy.
Bul joly Petropavldaǵy jaǵajaılarda karantındik sharalardyń saqtalýy tekserildi, dep habarlaıdy QazAqparat tilshisi.
«Nur Otan» partııasy SQO fılıaly baspasóz qyzmetiniń málimetinshe, is-sharaǵa oblystyq Tótenshe jaǵdaılar departamentiniń jáne Polıtsııa departamentiniń ókilderi qatysty. Reıd barysynda jaǵajaıda ruqsatsyz demalyp jatqandarǵa karantın talaptaryn saqtaý qajettigi eskertilip, túsindirildi.
«Biz volonter-jasotandyqtarmen Esil ózeni men Pestroe kólindegi qalalyq jaǵajaılarǵa reıdke jıi shyǵamyz. Qazir barlyq jaǵajaılar jabyq, biraq adamdar karantınge qaramaı osynda keledi. Biz olarǵa jaǵajaılar men qoǵamdyq oryndarǵa barýdyń qaýipti ekenin túsindirip, úıde otyrýǵa shaqyramyz», - deıdi «Jas Otan» JQ tóraǵasy Birjan Qudaıbergenov.
Oblysta karantındik shekteý sharalary kúsheıtilgennen beri jaǵajaılarǵa barǵany úshin 201 turǵyn ákimshilik jazaǵa tartyldy. Taǵy 258 adam ózen-kól basynda spırttik ishimdik ishkeni úshin jaýap berdi.
«Karantın kezinde biz oblys jaǵajaılaryna 900 reıd ótkizdik, bul jumysqa qosymsha 900 volonterdi tarttyq. Biz adamdarǵa áleýmettik qashyqtyqty saqtaý qajettigin aıtamyz. Negizinen mundaı reıdter túsindirý jumysymen aıaqtalady. Demalýshylardyń kópshiligi bizdiń ótinishimizge birden qulaq asyp, jınalyp ketedi. Biraq keıde polıtsııa ókilderi azamattarǵa aıyppul salady», - dedi SQO Tótenshe jaǵdaılar departamenti bastyǵynyń orynbasary Igor Jýkov.
Vedomstvoda atap ótkendeı, SQO-da sýǵa shomylý maýsymy bastalǵaly 8 adam qaza boldy. Olardyń arasynda 6 adam sýǵa shomylý kezinde, 1 adam sýǵa batqandy qutqarý kezinde jáne bireýi balyq aýlaý barysynda mert boldy.
