SQO-da jabylǵan ýran ken oryndaryndaǵy ekologııalyq máselelerdi sheshý úshin jol kartasy ázirlendi
PETROPAVL. QazAqparat – Soltústik Qazaqstan oblysynda kezinde ýran óndirilip, búginde jabylǵan on shaqty orny bar. Osy nysandardaǵy ekologııalyq máselelerdi sheshý úshin óńrde jol kartasy ázirlendi, dep habarlaıdy QazAqparat tilshisi.
SQO ekologııa departamentiniń málimetinshe, óńirde jabylǵan on shaqty ýran ken orny bar, olar Aıyrtaý aýdanyndaǵy «Grachevskoe», «Kosachınoe», «Aqan-Burlyq», №12 jáne №5 kenishteri, Ǵabıt Músirepov atyndaǵy aýdandaǵy «Shaqpaq», «Kamyshovoe», №3, №4 kenishteri.
Bul ıgerilgen ken oryndary ıesiz qalip, jergilikti turǵyndardyń ómiri men densaýlyǵyna qaýip tóndirgen bolatyn. Temir-tersek jınaýshylar qaýipti ekenin bile tura, kúzetilmeı jatqan nysandarǵa kirip, talan-tarajǵa salǵan, qorshaýlaryn buzyp áketken.
Mamandardyń aıtýynsha, kenishterdiń aýmaǵynda radıatsııa mólsheri áli de shamadan tys kóp, sondaı-aq ashyq jatqan qudyqtar bar.
«Basqarma paıdalanylǵan ken oryndaryndaǵy ekologııalyq máselelerdi sheshý maqsatynda jol kartasyn ázirledi. Oblystaǵy ıgerilgen ýran kenishteriniń jáne ken oryndary óndiristik alańdarynyń qorǵanys jabyndaryn qalpyna keltirý, qorshaý mindeti tur.
Ǵ.Músirepov atyndaǵy aýdandyq sottyń sheshimi negizinde osy aýdandaǵy paıdalanylǵan ýran kenishteri kommýnaldyq menshikke ótti. Chıstopole, Nejınka aýyldyq ákimdikteriniń balansyna bekitildi. Bul ákimdikter tıisti qujattardy istep, ádilet organdarynda tirkedi», - deıdi SQO ekologııa departamentiniń basshysy Azamat Bektasov.
Nátıjesinde kenishterdi konservatsııalaý boıynsha qajetti jumystar júrgizildi, aýmaǵy qorshalyp, plıtalar tóselip, radıatsııalyq qaýipsizdik belgilerin ornatty.
«Aıyrtaý aýdandyq ákimdiginiń qaýlysymen burynǵy «Grachevskoe» jáne «Kosachınnoe» kenishteri kommýnaldyq menshikke ótip, Volodarovka jáne Ýkraınskıı aýyldyq okrýgteriniń balansyna berildi. «Grachevskoe 107,8 ga-dy, «Kosachınnoe» 15,2 ga jerdi alyp jatyr. Jer ýchaskelerine aktiler jasaldy. Olardy qorshaý boıynsha qujattar ázirlendi. Endi osy maqsatqa 95 mln teńge qarajat kerek, oblystyq bıýdjettik komıssııa ony bıyl bekitken joq», - deıdi Azamat Bektasov.
Foto: focus.ua
