SQO-da jabaıy úırekterden qus tumaýy anyqtaldy
PETROPAVL. QazAqparat – Soltústik Qazaqstan oblysynyń Aıyrtaý aýdanynda jabaıy úırekterden qus tumaýy rastaldy, dep habarlaıdy QazAqparat tilshisi.
Ólgen qusty jergilikti turǵyndar tapqan. Veterınarııalyq qyzmettiń qyzmetkerleri taldaý jasaý jáne qustyń qyrylý sebebin anyqtaý maqsatynda bıologııalyq materıaldy jınaǵan.
Veterınarııa basqarmasynyń habarlaýynsha, Nur-Sultan qalasynda ótkizilgen zertteýdiń hattamasyna sáıkes, ólgen úırekterde qus tumaýy bolǵan.
Bul aýdanda úı qustarynyń qus tumaýyn juqtyrý oqıǵasy tirkelmegen. Sý qoımasynyń mańynda ornalasqan eldi mekenderde qustardy vaktsınalaý júrgizilýde. Qazirgi kezde 5,7 myń qusqa ekpe salynǵan.
Jaǵdaıdy mal dárigerleri men múddeli vedomstvolar qadaǵalap otyr, jergilikti turǵyndarmen baılanys ornatylǵan. Jabaıy ózge qustardyń qyrylýy tirkelmegen.
Eske sala keteıik, ótken kúzde óńirde jeke úıler men qus fabrıkalarynda qus tumaýy órshigen bolatyn. Qus fabrıkalary tek jaqynda ǵana jumyrtqa óndirisiniń kólemin arttyra bastady.
