SQO-da jabaıy túlki adamǵa shapty
PETROPAVL. KAZINFORM — Soltústik Qazaqstan oblysynda túlki keshqurym mektepten kele jatqan balaǵa shapty.
Jasóspirimniń aıtýynsha, ol ıtimen úıge kele jatqan, al túlki arttan shabýyldap, aıaǵynan tistemek bolǵan. Balanyń shalbaryn jyrtyp, qolynan qapqan. Qasyndaǵy ıtin de talap, keıin qashyp ketken.
Qatty qoryqqan bala qazir qutyrmaǵa qarsy em alyp jatyr.
Óńirde sońǵy ýaqytta túlkilerdiń aýylǵa kirýi jıiledi.
SQO tabıǵı resýrstar jáne tabıǵat paıdalanýdy retteý basqarmasy mamandarynyń aıtýynsha, túlkilerdiń kún sýytqanda eldi mekenderge kirýi qalypty jaǵdaı. Túlki sany oblys aýmaǵynda kóbeıgen joq. Sondaı-aq bul jabaıy janýardy eldi mekenderde atýǵa tyıym salynǵan. ıAǵnı túlkini tek arnaıy ańshylyq alqaptarda, ańshylyq maýsymy ashylǵanda, ruqsat qujattarmen ǵana atýǵa bolady.
— Qutyrma aýrýynyń aldyn alý úshin jabaıy janýarlar — túlki, qarsaq sııaqty ańdar vaktsınatsııadan ótedi. Ol úshin aýdandardyń veterınarlary olardyń jolyna arnaıy preparat-brıketter tastaıdy. Buǵan deıin osyndaı 10 myń doza taratyldy, osy aıda taǵy 15 myńǵa jýyq brıket ormandarǵa tastalady, — deıdi basqarmanyń ańshylyq jáne balyq sharýashylyǵy bóliminiń basshysy Mıhaıl Nıkıtın.
Mamannyń aıtýynsha, bıyl veterınarııa boıynsha Ulttyq referenttik ortalyq jabaıy faýnany monıtorıngteý aıasynda oblystyń Esil, Taıynsha jáne Mamlıýt aýdandarynda zertteýler júrgizdi. Nátıjesinde janýarlar arasynda qutyrma aýrýy anyqtalmaǵan.
— Jalpy, oblysta qutyrma jáne basqa da janýarlardyń juqpaly aýrýlary boıynsha epızootıkalyq jaǵdaı turaqty, — deıdi Mıhaıl Nıkıtın.
Buǵan deıin Mańǵystaýda túlki oqýshylarǵa shabýyl jasap, jaraqattaǵanyn jazǵan edik.