SQO-da jabaıy ańdarǵa qutyrmaǵa qarsy 24,8 myń brıket tastaldy
PETROPAVL. KAZINFORM - Soltústik Qazaqstan oblysynda bıyl úı janýarlary arasynda qutyrma aýrýynyń eki deregi tirkeldi.
Kóktemde Esil aýdany Amangeldi aýylynda ıesine shaýyp, talamaq bolǵan ıtten kúdiktengen turǵyn veterınarlarǵa júginip, kómek suraǵan. Júrgizilgen zerthanalyq saraptama nátıjesinde janýardan qutyrma derti anyqtaldy.
Al Taıynsha aýdanynda jazda qaýipti vırýsty mysyq juqtyrǵan.
SQO Veterınarııalyq qyzmettiń málimetinshe, oblysta úı jáne aýyl sharýashylyǵy janýarlaryn qutyrýǵa qarsy vaktsınatsııalaý jalǵasyp jatyr. Bıyl barlyǵy 306 myńǵa jýyq janýarǵa ekpe salyndy. Onyń ishinde 21 myńǵa jýyq ıt, 9,5 myń mysyq, 93 myńnan astam iri qara, 147 myń usaq mal jáne 35 myńnan astam jylqy vaktsınatsııalandy.
Desek te, aýrý úı janýarlaryna jabaıy ańdar arqyly da taralýy múmkin. Sondyqtan aýrýdyń aldyn alý sharalary úı jáne aýyl sharýashylyǵy janýarlarymen ǵana shektelmeıdi.
- Profılaktıkalyq shara ormandy jáne eldi mekendermen shektes aýmaqtarda júrgizildi. Vaktsına jabaıy ańdarǵa jem arqyly beriledi, ıaǵnı bul ádis olardy aýlamaı-aq qutyrýǵa qarsy ımmýnıtet qalyptastyrýǵa múmkindik beredi, - deıdi mamandar.
Qutyrma - janýardan adamǵa juǵatyn asa qaýipti ınfektsııalyq aýrý. Sondyqtan úı janýarynda kúmándi ózgerister baıqalsa nemese janýar adamdy tistep alǵan jaǵdaıda, veterınarııalyq jáne medıtsınalyq mamandarǵa dereý júginý qajet.
Esterińizge salaıyq, jyldyń basynda Qostanaı oblysynda qutyrmaǵa shaldyqqan sileýsin aýylǵa kirip ketken edi.
