SQO-da zeınetker jasóspirim qyzben jynystyq qatynasqa túskeni úshin 13,5 jylǵa sottaldy

PETROPAVL. KAZINFORM – Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty zeınetkerdi 13,5 jylǵa sottady. Oǵan kámelet jasyna tolmaǵan qyzben jynystyq qatynasqa tústi degen aıyp taǵylǵan edi.

SQO soty baspasóz qyzmetiniń málimetinshe, 2021 jyldyń naýryzynda jáne 2022 jyldyń jazynda S. esimdi zeınetker 16 jasqa tolmaǵan B. esimdi qyzben jynystyq qatynasqa túsken. 

Aıyptalýshy kinásin moıyndaýdan tolyq bas tartsa da, onyń qylmysyn kýágerler áshkereledi. Sondaı-aq sot saraptamasynyń qorytyndysy, zattaı aıǵaqtar jáne istiń basqa da materıaldary onyń kináli ekenin kórsetti. 

Prokýror, zardap shegýshiniń ókilderi er adamdy bas bostandyǵynan aıyryp, belgili bir qyzmettermen aınalysýǵa ómir boıyna tyıym salýdy surady. 

Sot úkimimen S. Qylmystyq kodekstiń 122-baby 3-tarmaǵynyń 1-bólimi — «On alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý» baby boıynsha 13 jyl 6 aıǵa bas bostandyǵynan aıyryldy. Jazasyn qylmystyq-atqarý júıesiniń ortasha qaýipsizdik mekemesinde óteıdi. Sondaı-aq pedagogıkalyq laýazymdar men kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıyna aıyryldy. 

Sot úkimi zańdy kúshine engen joq.

Jergilikti BAQ-ta sottalǵannyń belgili agrarıı ekeni aıtylǵan. 

68 jastaǵy Nebııýla Saǵyndyqov bes balanyń ákesi, osydan birer jyl buryn úlgili otbasy retinde respýblıkalyq «Mereıli otbasy» baıqaýyna qatysqan. 

Buǵan deıin SQO-da úsh sportshyǵa páter berilgenin jazǵan edik.