SQO-da zeınetker sýǵa batyp ketti
PETROPAVL. KAZINFORM - Soltústik Qazaqstan oblysynyń Aqjar aýdanyndaǵy Shat ózeninen jergilikti turǵyndar 64 jastaǵy er adamnyń denesin taýyp, sýdan shyǵaryp aldy.
SQO Tótenshe jaǵdaılar departamenti baspasóz qyzmetiniń málimetinshe, oqıǵa 14 maýsym kúni keshki ýaqytta Lenıngradskoe aýylynan 5 shaqyrym jerde bolǵan.
Aldyn ala málimet boıynsha, er adam shomylýǵa tyıym salynǵan jerde sýǵa túsip, batyp ketken. Oqıǵa ornyna tıisti qyzmetter shaqyrylyp, qajetti sharalar júrgizildi.
Osyǵan baılanysty SQO Tótenshe jaǵdaılar departamenti turǵyndardy sýdaǵy qaýipsizdik erejelerin qatań saqtaýǵa shaqyrady.
Mamandardyń aıtýynsha, azamattar tek arnaıy jabdyqtalǵan jáne resmı túrde ruqsat etilgen jaǵajaılarda ǵana shomylýy qajet. Mundaı oryndarda qaýipsiz demalys úshin barlyq jaǵdaı jasalyp, qutqarýshylardyń kezekshiligi uıymdastyrylady.
Zańnamaǵa sáıkes, belgilenbegen oryndarda shomylǵan azamattarǵa ákimshilik jaýapkershilik qarastyrylǵan. Quqyq buzýshylarǵa eskertýsiz 7 AEK mólsherinde - 30 myń teńgeden astam aıyppul salynady.
Buǵan deıin eki adam Qostanaı oblysyndaǵy Tobyl ózenine aǵyp ketkenin jazǵan edik.
