SQO-da zeınetker balalarǵa arnap uzyndyǵy 150 metrlik syrǵanaq jasady
PETROPAVL. QazAqparat – Soltústik Qazaqstan oblysyndaǵy Beskól aýylynyń turǵyny ıÝrıı Krasnoper balalarǵa arnap bıik syrǵanaq jasady. Búginde onyń syrǵanaǵy oblysqa ǵana emes, el aýmaǵynda tanymal, dep habarlaıdy QazAqparat tilshisi.
Qyzyljar aýdany Beskól aýylynyń 74 jastaǵy turǵyny ıÝrıı Krasnoper bıik syrǵanaqty besinshi jyl qatarynan turǵyzyp keledi.
Bıyl da zeınetker qys túsisimen úıiniń janynan uzyndyǵy shamamen 150 metrge jetetin syrǵanaqty eshkimniń kómeginsiz ózi salyp shyqty.
Qazir ol mundaǵy qaýipsizdikti ózi qadaǵalaıdy, ári syrǵanaqty qalypta ustap, mańaıyndaǵy qoqysty jınaıtyn da ózi.
Bul jumysy úshin bir tıyn da almaıdy, syrǵanaq tebý – tegin.
«Balalarym eseıip, ketti. Biz zaıybym ekeýimiz ǵana qaldyq. Birde osyndaı syrǵanaq jasaý oıyma keldi. Kóldiń jıeginde turǵandyqtan yńǵaıly, jaqsy yldı bar. Barlyq qajetti materıaldy zeınetaqyma satyp alyp, istep shyqtym. Qazir aýyl balalary sabaqtan bos ýaqytta osy jerden tabylady. Petropavldan arnaıy keletinder de bar. Tipti, shetelden de qonaqtar keldi. Olar kanadalyqtar, aǵylshyndar, reseılikter. Qazaqstannyń basqa óńirlerinen osy jaqqa qonaqqa kelgender de munda soqpaı ketpeıdi. Jurtqa paıdam tıip jatqanyna men de qýanyshtymyn», - deıdi ıÝrıı Krasnoper.
Kópshiliktiń kóńilinen shyqqan syrǵanaqtan bir mezette eki adam qatar túse alady.
Bıyl zeınetker ony keńeıtip, eki jolaqty etip jasaǵan. Ol bul jumysqa eki apta ýaqytyn sarp etken.
«Úıde jatsań aýyra beresiń, aıaq-qolyń syrqyraıdy, basyń aýyrady. Sol sebepti men tańerteń erte turyp, osy syrǵanaqqa kelem. Beti taıǵanaq bolýy úshin kúnde sý quıamyn, aınalasyn qardan tazartam. Saǵat 23.00-ge deıin syrǵanaq ashyq. Halyq kóp. Olar ketkennen keıin de mańaıdy jónge keltirý kerek. Mundaıda men aýyrǵan jerimdi umytamyn. Taza aýa densaýlyqqa jaqsy ǵoı. Kúni boıy syrǵanaqtyń basy balanyń daýysy men kúlkisinen aıqaı-shý bolyp jatady. Osylaısha olar telefon men kompıýterdi bir mezet umytyp, dalada betterine qan júgirip oınaıdy. Bul keremet emes pe?!», - deıdi ıÝrıı Krasnoper.
Zeınetkerdiń aıtýynsha, syrǵanaqqa kelýshiler sany jyldan-jylǵa artyp keledi. Sol sebepti ol kelesi jyly ony budan da úlkeıtip, tórt jolaqty etpek.
