SQO-da zeınetke shyqqan muǵalimderge 38 mln teńgege jýyq ótemaqy tólenbegen

PETROPAVL. KAZINFORM – Soltústik Qazaqstan oblysynyń prokýrorlary bilim salasyndaǵy qyzmetkerlerdiń konstıtýtsııalyq quqyqtaryn qorǵady.

SQO prokýratýrasynyń málimetinshe, qadaǵalaý organy taldaý barysynda eńbek zańnamasyn óreskel buzý faktilerin anyqtady.

Aıyrtaý, Ǵ.Músirepov, Esil, Jambyl, M.Jumabaev, Qyzyljar, Shal aqyn, Taıynsha, Ýálıhanov aýdandary men Petropavl qalasyndaǵy jalpy bilim berý mekemeleri zeınetkerlik jasqa jetip, jumystan shyqqan 295 qyzmetkerge 37,6 mln teńge mólsherinde ótemaqy tólemderin tólemegen.
Sondaı-aq, Esil, Ǵ.Músirepov, Taıynsha aýdandarynda Kodeks talaptaryn buza otyryp, 37 muǵalimge biliktiligin arttyrý kýrstarynan ótkeni úshin 4,3 mln teńge mólsherinde issapar shyǵyndary tólenbegen.

Prokýrorlyq qadaǵalaý aktileri boıynsha kináli laýazymdy tulǵalar tártiptik jaýapkershilikke tartylyp, 25 qyzmetkerge 4,9 mln teńge kóleminde tólem jasaldy.

Qalǵan qyzmetkerler boıynsha jumys júrgizilip jatyr. 

Jalpy prokýratýra organdary jyl basynan beri 329 qyzmetkerdiń konstıtýtsııalyq quqyǵyn qorǵady.

Buǵan deıin Petropavlda soǵys ardageriniń jaraqattanýyna qatysty tergeý júrip jatqanyn jazdyq.