SQO-da zeınetaqy jınaǵyn alǵandardyń 85 paıyzy ony baspanaǵa jumsaǵan

PETROPAVL. QazAqparat – Soltústik Qazaqstan oblysynda byltyr zeınetaqy qoryndaǵy shekti mólsherden asqan somany 12 095 adam paıdalansa, bıyl shamamen 3,5 aıdyń ishinde 14 867 adam qoldana alǵan, dep habarlaıdy QazAqparat tilshisi.

SQO-da turǵyndar 1 sáýirdegi zeınetaqy qoryndaǵy jetkiliktilik shegi ózgergenge deıin qoljetimdi somany alyp qalýǵa tyrysty. Jyl basynan turǵyn úı jaǵdaıyn jaqsartýǵa ǵana 16 892 ótinish túsken.

«Óńir turǵyndary turǵyn úı jaǵdaıyn jaqsartýǵa ǵana jalpy somasy 30,5 mlrd teńgeni paıdalaný úshin ótinish bildirdi. Bul barlyq ótinishterdiń - 92 %-y. Alaıda tek 9,75 mlrd teńgeniń 12 446 ótinishi ǵana oryndaldy. Jalpy SQO salymshylarynyń arnaıy shottaryna 11,4 mlrd teńge tústi. Oryndalǵan ótinishter sany – 14 867, sonyń ishinde 28 adam 13 mln teńgesin ınvestıtsııalady», - deıdi BJZQ SQO fılıaly baryp qyzmet kórsetý bóliminiń bastyǵy Ǵalııa Muqanova.

3,5 aıda SQO turǵyndarynan 17 myńǵa jýyq ótinish tússe, byltyr jyl boıyna 16 myńnan astam turǵyn zeınetaqy qoryndaǵy qoljetimdi somany paıdalanbaq bolǵan.

«Ótinishterdiń 95,49 %-y, ıaǵnı 14 637-si – turǵyn úı jaǵdaıyn jaqsartýǵa, 3 %-y - 1 629-y – emdelýge qatysty jáne 95-i qoljetimdi somany ınvestıtsııalyq portfeldi basqarýshylarǵa aýdarmaq boldy. Jalpy soma 43,3 mlrd teńgeni qurady. Biraq 12 095 adamnyń ǵana ótinishi qanaǵattandyryldy. Osylaısha olar 19,3 mlrd teńgeni maqsatty jumsaı aldy», - deıdi Ǵalııa Muqanova.