SQO-da zeınetaqy qory salymshylarynyń 2,5 mlrd teńgesi arnaıy shottarǵa tústi
«BJZQ» AQ SQOF dırektory Ramazan Muqanovtyń aıtýynsha, 2021 jylǵy 1 qańtardaǵy derekterge saı SQO boıynsha 11 807 adam zeınetaqy jınaqtarynyń shekti deńgeıden asqan bir bóligin maqsatty túrde paıdalana alady. Olarǵa 21 mlrd-qa jýyq teńge qoljetimdi.
«2021 jyldyń 22 aqpanyndaǵy jaǵdaı boıynsha BJZQ-ǵa el boıynsha ýákiletti operatorlardan: «Otbasy Banki» TQJB» AQ, «Qazaqstan Halyq Banki» AQ, sondaı-aq, «Bank TsentrKredıt» AQ-nan turǵyn úı jaǵdaılaryn jaqsartý maqsatynda birjolǵy zeınetaqy tólemderin júzege asyrýǵa 158 276 ótinish kelip tústi. Jalpy somasy 543,6 mlrd teńge bolatyn 102 650 ótinish oryndaldy. Salymshylardyń arnaıy shottaryna túsken tólemderdiń ortasha somasy 5,3 mln teńgeden asady.
SQO boıynsha 15 aqpanǵa 1 634 ótinish qabyldanyp, onyń 1 045 oryndaldy, arnaıy shottarǵa shamamen 2,5 mlrd teńge tústi», - deıdi Ramazan Muqanov.
Oryndalǵan ótinishterdiń basym bóligi – 38 %-y ıpotekalyq qaryz boıynsha bereshekti ishinara nemese tolyq jabý maqsatynda berilgen. Salymshylardyń 26 %-dan astamy zeınetaqy aqshasyn turǵyn úıdi ıpotekasyz satyp alýǵa jiberý týraly sheshim qabyldaǵan. Zeınetaqy jınaqtaryn paıdalanýǵa eń kóp ótinish bergenderdiń úshinshi toby – 19 %-dan astamy qarajatty jaqyn týystaryna bergen.
«Zeınetaqy jınaqtaryn emdelýge paıdalaný talaptarynyń kúshine engenine kóp kún ótken joq. Sondyqtan SQO boıynsha ázirge ótinish joq. Birjolǵy zeınetaqy tólemderin emdelýge paıdalaný maqsatyndaǵy ótinishter Qorǵa «Otbasy banki» TQJB» AQ ýákiletti operatory arqyly 25 aqpannan bastap túse bastaıdy dep esepteımiz», - deıdi fılıal dırektory.
«BJZQ» AQ SQOF ishki statıstıkasyna sáıkes, óńirde 134 salymshy 10 mıllıon teńgeden astam qarajatty maqsatty túrde alý múmkindigine ıe.