SQO-da zeınetaqy jınaǵynyń shekti somadan asqan bóligin turǵyndar negizinen baspana alýǵa jumsaǵan
PETROPAVL. KAZINFORM – Soltústik Qazaqstan oblysynda byltyr shamamen 2,6 myń adam zeınetaqy qoryndaǵy jınaqtyń shekti somadan asqan bóligin paıdalanbaq boldy. Olardyń 1,7 myńy 9 mlrd 147 mln somany baspana alýǵa jumsaý úshin ótinish bergen.
Elimizde 2021 jyldan bastap zeınetaqy jınaǵynyń shekti somadan asqan bóligin maqsatty túrde jumsaýǵa, ıaǵnı baspana alýǵa nemese ıpotekalyq nesıeni jabýǵa, emdelýge jáne ınvestıtsııalaýǵa ruqsat berilgen. «Biryńǵaı jınaqtaýshy zeınetaqy qory» AQ SQO fılıaly baspasóz qyzmetiniń málimetinshe, byltyr 1731 adamnan 9 147 mln teńgeni turǵyn úı jaǵdaıyn jaqsartý úshin jumsaýǵa 2 895 ótinish túsken. Onyń ishinde 1 590 adamnyń 3 275 mln teńge somasyna ótinishi oryndaldy. Biraq 510 adamnyń 896 mln teńgesi qorǵa qaıtarylǵan.
Bıyl jarty jylda jınaqtaǵy artylǵan somany baspana alýǵa jumsaýǵa 824 adamnan 1505 ótinish túsken, jalpy soma – 2 037 mln teńge. Biraq 246 adamnyń ótinishi boıynsha 385 mln teńge qordaǵy jeke esepshottaryna qaıtaryldy.
Óńir turǵyndary zeınetaqy jınaǵynyń bir bóligin emge jumsaǵan. Máselen byltyr 815 adam ótinish bildirse, bıyl 341 adam jınaqtaǵy artylǵan somany emine jumsamaq boldy.
«Byltyr 759 adam 1 107 mln teńgeni emdelý úshin aldy. Biraq 56 adam 56 mln teńgeni ótinishi boıynsha qaıtarǵan. Turǵyndardyń basym bóligi stomatologııalyq qyzmetke júginedi. Sanaýly bóligi ǵana oftalmologııalyq em alǵan. Bıyl 325 adamnyń 430 mln teńgege ótinishi maquldandy», - deıdi «BJZQ» AQ SQO boıynsha fılıalynyń baspasóz qyzmeti.
Zeınetaqy jınaǵynyń shekti somadan asqan bóligin jeke basqarýshy kompanııalarǵa basqarýǵa berýge byltyr 85 adam ótinish bildirgen. Osylaısha 108 mln teńgesin ınvestıtsııalamaq bolǵan. Olardyń 82-siniń ótinishi maquldandy. Bıyl 148 mln teńgesin 98 adam kompanııalardyń basqarýyna bergisi kelse, solardyń 96-synyń ótinishi oń sheshildi. Bir adamnyń 7 mln teńgesi óz ótinishi boıynsha qordaǵy jeke esepshotyna qaıtaryldy.
«Qazirgi ýaqytta «BJZQ» AQ bes jeke basqarýshy kompanııamen zeınetaqy aktıvterin senimgerlik basqarý týraly shartqa otyrǵan. Olar: «Jusan Invest» AQ, «Halyk Global Markets» AQ, «BCC Invest» AQ, «Sentras Sekıýrıtız» AQ jáne «Halyk Finance» AQ.
Salymshylar BJZQ-ǵa ótinish jazyp, zeınetaqy jınaqtaryn bir jeke basqarýshy kompanııadan ekinshisine senimgerlik basqarýǵa bere alady. Biraq ol úshin araǵa bir jyl salýy kerek», - deıdi fılıal mamandary.
Buǵan deıin SQO-da kartop pen qııardyń baǵasy túspeı turǵanyn jazǵan edik.
