SQO-da zaýyttar eńbekaqyny tamyzdan bastap 10-15% ósiredi
Bul jaıynda SQO ákimdiginde óńirdiń jarty jyl ishindegi áleýmettik-ekonomıkalyq damýyn qorytyndylaǵan otyrysta belgili boldy. Oblys ákimi Qumar Aqsaqalov jıynda halyqtyń ál-aýqatyn ósirýge basa nazar aýdardy. Kásiporyndardyń arasynda alǵash bolyp eńbekaqyny 1 tamyzda «Kırov atyndaǵy zaýyt» ósirmek.
Bul jumys agroónerkásip salasynda da júrgizilmek.
«Kúzgi oraq bastalǵansha deıin ujymdyq sharttarǵa ózgerister engizýdi tapsyrǵan bolatynmyn. Jumysshylarynyń eńbekaqysy tómen barlyq aýyl sharýashylyǵy taýarlaryn óndirýshiler osyny qarastyrý kerek. Oblysta aýyl sharýashylyǵy damyp keledi. Memleketten orasan qoldaý kórsetilip jatyr, ınvestıtsııa bar. Munyń qaıtarymy bolyp, halyqtyń kiris deńgeıi artýy qajet. Bul jumysty 10 tamyzǵa deıin aıaqtaýdy tapsyramyn», - dedi óńir basshysy.
Aqshasyz tólem jasaý óńirde áli de tómen. Oblys ákimi bul máselege taǵy da toqtalyp, aqshasyz tólem jasaýǵa kóshýdiń qanshalyqty tıimdi ekenin aıtty.
«390 turǵyn úı kooperatıvi men qoqys shyǵaratyn kásiporyndar biryńǵaı tólem júıesine engizilmegen. Aınalysta qomaqty qolma-qol aqsha júr. Bul kóleńkeli ekonomıkaǵa ákelýi múmkin. Biz arnaıy biryńǵaı tólem júıesin qurdyq, oǵan barlyq kommýnaldyq qyzmetterdi qosý qajet», - dedi Qumar Aqsaqalov.
Jastar saıasaty týraly suraqty qarastyrý kezinde oblys ákimi jastar arasyndaǵy jumyssyzdyqty tómendetip, M. Qozybaev atyndaǵy Soltústik Qazaqstan memlekettik ýnıversıtetiniń agrotehnıkalyq fakýltetine stýdentterdi tartý boıynsha jumysty jandandyrýdy tapsyrdy.
