SQO-da zańsyz saýdadan 758 pırotehnıka ónimi alyndy
PETROPAVL. QazAqparat – Soltústik Qazaqstan oblysynda «Pırotehnıka» jedel-aldyn alý is-sharasy aıasynda zańsyz saýdadan 758 pırotehnıka ónimi alyndy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, 17 jeltoqsan kúni bastalǵan «Pırotehnıka» jedel-aldyn alý is-sharasy aıasynda kúndelikti 100-ge jýyq tártip saqshysy men tótenshe jaǵdaı departamentiniń qyzmetkerleri oblys boıynsha kezekshilik atqarady.
«Reıdtiń maqsaty – lıtsenzııasy joq pırotehnıkalyq ónimdi saýdadan alý. Otshashýlar ádemi bolǵanymen, qaýipti. Alaıda merekelik kóńil-kúımen júrip, kópshilik qarapaıym qaýipsizdik erejelerin esten shyǵaryp jatady. Oqys jaǵdaılardy boldyrmaý úshin jedel-aldyn alý is-sharalaryn ótkizemiz. Pırotehnıka óniminde mindetti túrde qoldaný nusqaýlyǵy memlekettik tilde jazylýy tıis. Budan basqa nusqaýlyqta qalaı paıdalaný, iske qosý jáne saqtaý sııaqty málimetter kórsetilgeni jón», - deıdi Petropavl qalalyq polıtsııa basqarmasynyń ákimshilik polıtsııa bóliminiń aǵa ınspektory Álisher Jarmaǵanbetov.
«Pırotehnıka» is-sharasy barysynda Petropavl qalasynyń tártip saqshylary men tótenshe jaǵdaılar departamentiniń qyzmetkerlerine negizgi kúsh túsedi. Óıtkeni quqyqbuzýshylyqtardyń basym bóligi oblys ortalyǵynda tirkeledi. Naýqan bastalǵaly 80-nen astam tekseris júrgizilgen. Nátıjesinde 15 ákimshilik hattama toltyrylyp, ruqsat qaǵazy joq 758 pırotehnıkalyq ónim tárkilendi. Іs-shara 4 qańtarǵa deıin jalǵaspaq.
