SQO-da zańsyz saqtalǵan jeti qarý tárkilendi
PETROPAVL. QazAqparat – Soltústik Qazaqstan oblysynda ótken «Qarý» jedel-profılaktıkalyq is-sharasy aıasynda polıtseıler zańsyz saqtalǵan 7 qarýdy tárkiledi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, búgingi tańda óńirdiń 7 292 turǵynynda 12 270 qarý bar, onyń ishinde 998-i oıyqty. Qarýdyń qylmysta paıdalanýyna jol bermeý maqsatynda polıtseıler aqpannyń 17-si men 19-y aralyǵynda «Qarý» jedel-profılaktıkalyq is-sharasyn ótkizdi. Tártip saqshylary qarý ıelerin turǵylyqty mekenjaılary boıynsha tekserdi.
Polıtseılerdiń aıtýynsha, kóp jaǵdaıda soltústikqazaqstandyqtar qarýǵa arnalǵan seıfterde bógde zattardy saqtaıdy. Bulaı isteýge bolmaıdy. Qarýǵa qatysty qujattardyń ózi bólek saqtalýy kerek. Tekserý barysynda jıi kezdesetin taǵy bir olqylyq – jumys istemeıtin dabylqaqqyshqa baılanysty. Sondaı-aq ýchaskelik polıtsııa ınspektorlarymen ótkiziletin birlesken tekserister kezinde qarýdy zańsyz saqtaý faktileri anyqtaldy.
Máselen, Ǵ.Músirepov atyndaǵy aýdannyń turǵyny atasynan qalǵan 16 kalıbrli eki uńǵyly myltyqty saqtap kelgen. Polıtseıler qarý ıesi qaıtys bolǵan jaǵdaıda bir aıdyń ishinde qarýdy aýmaqtyq polıtsııa bólimine saqtaýǵa tapsyrý qajettigin eskertedi, keıin qarýdy óz atyna resimdeý nemese satyp jiberý týraly sheshim qabyldaýy qajet. Qarýdy tirkemegen er adamǵa «Jeke jáne zańdy tulǵalardyń qarýdy zańsyz ıelenip alýy, berýi, ótkizýi, saqtaýy, alyp júrýi, tasymaldaýy» baby boıynsha materıal jınaldy.
«Eki kúnniń ishinde zańsyz saqtalǵan 7 qarý alyndy. 2,5 myńnan astam qarý ıesi tekserildi, onyń 60-sy saqtaý erejelerin, 17-si tirkeý jáne qaıta tirkeý erejelerin buzǵany úshin jaýapqa tartyldy», - deıdi SQO PD Ákimshilik polıtsııa basqarmasynyń asa mańyzdy tapsyrmalar jónindegi aǵa ınspektory Qurman Mýsın.
