SQO-da zańsyz balyq aýlaǵandarǵa 4 mln teńge aıyppul salynbaq
PETROPAVL. QazAqparat - Soltústik Qazaqstan polıtseıleri Shal aqyn aýdanynda zańsyz balyq aýlaǵan eki brakonerdi ustady, dep habarlaıdy QazAqparat tilshisi.
Oblystyq ІІD baspasóz qyzmetiniń aqparatyna qaraǵanda, ekeýi de Petropavldyń turǵyny. Olar balyq ýyldyryq shashatyn kezde qaıyqpen Sergeev sý qoımasyna 6 tor salyp, zańdy buzǵan. Ustalǵandardyń birine tıesili avtomobılde taǵy 15 aý quraly bolǵan. Brakonerler aýlaǵan shortan, móńke balyqtarynyń jalpy salmaǵy 173 kılogramdy qurady. Olar munymen memleketke 400 myń teńgeden astam zalal keltirdi.
«Osy fakti Sotqa deıingi tergep-tekserýlerdiń biryńǵaı tizilimine «Adamdar tobynyń aldyn ala sóz baılasýymen ýyldyryq shashatyn jerlerde balyq resýrstaryn, basqa da sý janýarlaryn nemese ósimdikterin zańsyz alý» babymen (QR QK 335-baby) tirkeldi. Soǵan sáıkes kúdiktilerge 2 myń AEK mólsherinde aıyppul salynýy nemese eki jyl merzimge bas bostyndyǵynan aıyrý jazasy belgilenýi múmkin», - dep málimdedi baspasóz qyzmetindegiler. 
Polıtseılerdiń aıtýynsha, áýesqoı balyqshylar tarapynan qylmystyq quqyqbuzýshylyq faktisi bıyl birinshi ret tirkelip otyr. Esil ózeni jáne onyń tarmaqtarynda balyq aýlaýǵa salynǵan tyıym 20 mamyrǵa deıin jalǵasady.
Jalpy, oblysta jyl basynan beri 300 tabıǵat qorǵaý zańnamasyn buzý faktisi tirkeldi. Ekologııalyq qylmys derekteri boıynsha 37 qylmystyq is qozǵaldy. Ań aýlaý erejelerin buzǵany úshin 166 adam, balyq aýlaý erejelerin buzǵany úshin taǵy 97 adam ákimshilik jaýapqa tartylǵan.
