SQO-da zańsyz aınalymnan 500 lıtrge jýyq alkogol alyndy

PETROPAVL. QazAqparat – Soltústik Qazaqstan oblysynda «Turmys» jedel-aldyn alý is-sharasy aıasynda esepte turǵan 6 myńǵa jýyq adam tekserilip, alkogol ónimin zańsyz satýdyń 4 deregi anyqtaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Mamlıýt aýdanynyń turǵyny spırttik ishimdik satýǵa ruqsat lıtsenzııasy bolmasa da dúkeninde alkogol satyp kelgen. Polıtseıler saýdagerden 70 lıtr alkogol ónimin tárkiledi. Saraptama taǵaıyndaldy. Kásipker endi ákimshilik jaýapkershilikke tartylady.

Bul Mamlıýt aýdanynda anyqtalyp otyrǵan birinshi jaǵdaı emes. «Turmys» operatsııasy aıasynda úıde spırttik ishimdik satýdyń taǵy úsh deregi anyqtaldy.

«Turmys» jedel-aldyn alý is-sharasy 19-24 naýryz aralyǵynda oblys aýmaǵynda ótti. Operatsııanyń negizgi maqsaty – otbasylyq-turmystyq qylmystardy anyqtaý, aldyn alý. Bul qylmystar negizinen mas kúıde jasalady. Sol sebepti alkogol ónimderin satýda zańnamanyń saqtalýyn qatań baqylaýda ustaımyz», - deıdi SQO PD JPQ basqarmasynyń bastyǵy Aıdyn Baımatov.

Іs-shara ótken bes kúnniń ishinde tártip saqshylary esepte turǵan 6 myńǵa jýyq turǵyndy tekserdi. Nátıjesinde túrli 886 quqyq buzýshylyq tirkeldi. Onyń 88-i turmysqa qatysty.

Jalpy jyl basynan zańsyz aınalymnan 492 lıtr alkogol ónimi alyndy.