SQO-da zańsyz ashylǵan 600-den astam qoqys polıgony spýtnık arqyly anyqtaldy
PETROPAVL. QazAqparat – Soltústik Qazaqstan oblysynda spýtnık arqyly 773 qoqys polıgony anyqtalsa, sonyń 606-synyń ruqsaty joq, dep habarlaıdy QazAqparat tilshisi.
SQO Ekologııa departamenti baspasóz qyzmetiniń málimetinshe, QR Energetıka mınıstrligi men «Qazaqstan Ǵarysh Sapary» UK» AQ arasynda kelisimshart bar. Sońǵysy Geoportal quryp, spýtnıkten jerdi qashyqtan zondtaý arqyly ruqsaty joq qoqys polıgondarynyń ǵaryshtyq sýretterin usynady.
Ǵaryshtyq monıtorıng barysynda Petropavl men oblys qalalarynyń 50 shaqyrymdyq aýmaǵy tekserildi. Mamandar zańsyz ashylǵan qoqys polıgondaryn ǵana anyqtap qoımaı, olardyń shekaralaryndaǵy ózgeriske de mán berdi.
«Ǵarysh monıtorınginiń nátıjesine oraı SQO aýmaǵynda 773 qoqys orny anyqtaldy. Olardyń 606-synyń ruqsaty joq. 49 qoqys polıgonynyń shekarasy zańsyz ózgertilgen. 118 jerge qaldyqtardy tógýge ruqsat etilgen. Osyǵan oraı ekologtar 238 ret reıdke shyǵyp, ruqsatsyz qoqys tógilgen oryndardy naqtylady», - delingen baspasóz habarlamasynda.
Bıyl ruqsaty joq qoqys polıgondaryn joıýǵa Petropavl qalasy men aýdan ákimdikterine 185,5 mln teńge bólingen. Arnaıy hat ta joldandy. Alaıda búginge deıin olardyń tek 134-i ǵana joıyldy. Bul tek 20,45% ǵana.
«QR Ekologııalyq kodeksine sáıkes, jergilikti atqarýshy organdar kommýnaldyq qaldyqtardy bólek jınaýdy, saqtaýdy, udaıy áketýdi, qaıta óńdeýdi, kádege jaratýdy jáne zalalsyzdandyrýdy, sondaı-aq eldi mekenniń aýmaǵyn tazartýdy júzege asyryp, kommýnaldyq qaldyqtardy jınaýdyń utymdy jáne ekologııalyq qaýipsiz júıesin uıymdastyrýy qajet. Jergilikti ákimdikterdiń áreketsizdigi qorshaǵan ortanyń lastanýyna ákelýde. Osyǵan oraı, qoqys úıindilerin joıý jumysy ýaqtyly atqarylýy úshin aqparat SQO ákiminiń birinshi orynbasaryna jiberildi», - deıdi ekologııa departamentiniń mamandary.
