SQO-da zańsyz araq-sharap dúkenin ashqan turǵyn jaýapkershilikke tartyldy
PETROPAVL. QazAqparat – Soltústik Qazaqstan oblysy Mamlıýt aýdanynyń turǵynynan polıtseıler 200 lıtrge jýyq alkogol ónimin tárkiledi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Mamlıýt aýdanynyń polıtseıleri kásipkerlikpen aınalysqan turǵynan 200 lıtrge jýyq alkogol ónimin tárkiledi. Onyń úıinen araq-sharap ónimderi, konıak, syra tabyldy. Munyń bárin ol lıtsenzııasyz satqan. Munymen qatar araq-sharapty onyń úıinen kez kelgen ýaqytta satyp alýǵa bolatyny anyqtaldy.
«Zańsyz ónim «Quqyqtyq tártip» jedel-profılaktıkalyq is-sharasy aıasynda anyqtaldy. Mamlıýt aýdanynyń polıtseıleri úı-úıdi aralaý barysynda ruqsat qujatynsyz alkogol satý deregin anyqtady. Turǵynnyń úıinen 192 lıtr túrli spırt ishimdik alyndy. Er adamǵa qatysty «Tıisti tirkeýsiz, ruqsatsyz nemese habarlama jibermeı kásipkerlik nemese ózge qyzmetpen aınalysý, sondaı-aq áreketterdi júzege asyrý» baby boıynsha ákimshilik materıal jınalyp, sotqa jiberildi», - dedi aýdandyq polıtsııa bóliminiń bastyǵy Serik Áljanov.
10-14 maýsym aralyǵynda ótken shara kezinde polıtseıler zańsyz aınalymnan 270 lıtrden astam araq-sharap tárkiledi. Alkogol ónimderin satý jónindegi zań talaptaryn buzǵany úshin 16 adam jaýapqa tartyldy.
Aqerke Dáýrenbekqyzy
