SQO-da zańsyz ań aýlaǵandar jazaǵa tartyldy

PETROPAVL. QazAqparat – Soltústik Qazaqstan oblysynda zańsyz sibir eligin atyp aldy degen kúdikpen aýyldyń eki turǵyny ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Jambyl aýdany polıtsııa bóliminiń qyzmetkerleri zańsyz ań aýlady degen kúdikpen jergilikti eki turǵyndy ustady.

Tártip saqshylary «Brakoner» jedel-profılaktıkalyq is-sharasy aıasynda reıdke shyqqan. Orman ishinde polıtseıler ekeýdi kórip, tekserý úshin toqtatpaq bolady, alaıda olar qashyp ketýge tyrysady.

31 jáne 33 jastaǵy aýyl turǵyndarynyń qashatyndaı jóni bar eken, oqıǵa ornynan sibir eliginiń múshelengen eti, 12-shi kalıbrli IJ-43 ańshy myltyǵy, patrondar men gılzalar, pyshaq tárkilendi. Tekseris barysynda myltyq tirkelmegen bolyp shyqty.

Atalǵan fakti QR Qylmystyq kodeksiniń 337-baby 3-bóligi «Zańsyz ańshylyq» boıynsha Sotqa deıingi tergep-tekserýlerdiń biryńǵaı tizilimine engizildi. Óńir tabıǵatyna keltirilgen shyǵyn mólsherin anyqtaıtyn saraptamalar taǵaıyndaldy.

«Adamdar tobymen jasalǵan zańsyz ańshylyq 5 myń AEK kórsetkishke deıingi mólsherde aıyppul salý, ne múlkin tárkilep, bes jylǵa deıingi merzimge bas bostandyǵynan aıyrý jazasy qarastyrylatynyn eske salamyz. Bul bıyl aýdanda anyqtalǵan zańsyz ań aýlaýdyń alǵashqy faktisi», - deıdi Jambyl aýdany PB bastyǵy Asan Meıramov.

«Brakoner» is-sharasy oblys aýmaǵynda 20 qazannan bastap júrgizildi. Osy sııaqty qylmystarǵa jol bermeý boıynsha jumys kúsheıtildi. Budan bólek, múddeli uıymdardyń ókilderimen birlese qurylǵan mobıldik toptar reıdtik is-sharalardy qarqyndy túrde qolǵa aldy. Aktsııa ótken ýaqytta oblys aýmaǵynda barlyǵy zańsyz ańshylyqtyń 9 faktisi anyqtaldy.