SQO-da zańsyz ań aýlaǵandar ustaldy
PETROPAVL. QazAqparat – Soltústik Qazaqstan oblysynda brakonerler esh jerde tirkelmegen myltyqtarmen ań aýlap, qolǵa tústi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, zańsyz ań aýlaý deregi 21 maýsym kúni Shal aqyn aýdanynda tirkeldi. Ótken jeksenbi keshkilik aýdandyq polıtsııa bólimi men orman sharýashylyǵy basqarmasynyń qyzmetkerleri zańsyz ań aýlaýdyń aldyn alý úshin reıdtik is-shara ótkizdi. Povozochnoe aýylynyń mańynda olardyń nazaryna «VAZ» avtokóligi túsken, tabıǵatty qorǵaýshylardy baıqaǵan júrgizýshi jasyrynbaq boldy. Polıtseıler ormanda qaldyrylǵan Lada kóligi arqyly onyń ıesi 31 jastaǵy Ortakól aýylynyń turǵyny ekendigin anyqtady.
Іzdestirý is-sharalary nátıjesinde polıtseıler ań aýlamaq bolǵan aýdannyń úsh turǵynynyń ústinen tústi. Qazirgi ýaqytta olardyń barlyǵy ustaldy.
«Alynǵan eki myltyq jáne orman alqaptarynda ár jerge jasyrǵan urǵashy sibir eliginiń eti - brakonerlerdiń zańsyz ań aýlaýdy kásipke aınaldyrǵanynyń belgisi. Tergeý barysynda ańshylar ań aýlaǵan jerlerin kórsetti», - deıdi tártip saqshylary.
Zańsyz ańshylyq faktisi boıynsha sotqa deıingi tergeý bastaldy. Myltyqtardyń tirkelmegeni de belgili boldy. Qarýdy zańsyz saqtaý faktisi boıynsha ákimshilik materıal jınaldy.
«Qazirgi kezde ań aýlaýǵa tyıym salynǵan. Jyl basynan zańsyz ań aýlaýdyń 12 deregi anyqtaldy. Brakonerlerge qatysty qylmystyq qýdalaý sharalary qabyldandy. Ań aýlaý tártibin buzýǵa baılanysty anyqtalǵan 200-den astam fakti boıynsha ákimshilik jaýapkershilik taǵaıyndaldy», - deıdi SQO PD tabıǵatty qorǵaý polıtsııasynyń aǵa ınspektory Ashat Qojabaev.
