SQO-da zańsyz mıkroqarjylyq qyzmetpen aınalysqan turǵyn sottaldy
ASTANA. KAZINFORM — Soltústik Qazaqstan oblysynda lıtsenzııasyz zańsyz kásipkerlik jáne mıkroqarjylyq qyzmetpen aınalysqan Rostovşıkov E.V. 2 jylǵa bas bostandyǵyn shekteý jazasyna kesildi. Tergeý barysynda onyń qaryz berýdiń 78 epızodyna qatysy anyqtalyp, zańsyz qyzmetten túsken 774 mln teńgege satyp alynǵan aktıvteri memleket kirisine tárkilendi.
Qarjylyq monıtorıng agenttiginiń málimetinshe, tergeý barysynda QMA-nyń SQO boıynsha departamenti zańsyz qaryz berýdiń 78 epızodyn anyqtady. Ádette qaryz alýshylar aqshaǵa asa muqtaj, bankten nesıe ala almaǵan azamattar bolǵan.
Qaryz berý úshin eki túrli shema qoldanylǵan.
— Birinshi jaǵdaıda notarıýs arqyly qaryz sharty rásimdelgen, alaıda mámileniń naqty talaptary onda kórsetilmegen. Qujattaǵy somaǵa qaryz alýshyǵa berilgen qarajat ta, qaryzdy paıdalanǵan búkil kezeń úshin eseptelgen paıyz da engizilgen. Aqshanyń qaıtarylýyn qamtamasyz etý úshin múlik kepilge qoıylǵan. Ekinshi jaǵdaıda qaryz berý deregi satyp alý-satý sharty retinde búrkemelengen. Múlik úshin aqsha is júzinde berilmegen, al múliktiń ózi qaryzdyń kepili retinde paıdalanylǵan. Qarajat qaıtarylǵannan keıin shart buzylyp, múlik ıesine qaıtarylǵan, — delingen habarlamada.
Osylaısha, azamattyq-quqyqtyq mámileler túrinde shyn máninde paıyzben jáne múlikti kepilge alyp júıeli túrde qaryz berý júzege asyrylǵan.
Zańsyz qyzmettiń nátıjesinde 774 mln teńge qylmystyq tabys alynǵan. Bul qarajatqa qymbat aktıvter satyp alynǵan.
Sot úkimimen memleket kirisine 6 páter, Toyota RAV4 avtokóligi, Kawasaki KLX250 mototsıkli, sondaı-aq quny 280 mln teńge bolatyn baǵaly qaǵazdar tárkilendi.
Sot úkimi zańdy kúshine engen joq.
Eske salaıyq, buǵan deıin Almaty oblysynda 800-den astam kólikti zańsyz tirkeýge qoıǵan 17 adam sottalǵanyn habarlaǵanbyz.
