SQO-da zańsyz kóshi-qondy uıymdastyrǵan top quryqtaldy
PETROPAVL. KAZINFORM – Soltústik Qazaqstan oblysynda polıtsııa qyzmetkerleri sheteldikterge jalǵan qujattar daıyndap, olardyń elde zańsyz jumys isteýine kómektesken toptyń qyzmetin toqtatty.
SQO Polıtsııa departamenti baspasóz qyzmetiniń málimetinshe, kúdiktiler oblystyq polıtsııa departamentiniń krımınaldyq polıtsııa basqarmasy qyzmetkerleri Іshki ister mınıstrligi men Ulttyq qaýipsizdik komıtetiniń SQO boıynsha departamenti mamandarymen birlesip júrgizgen jedel is-shara barysynda ustaldy.
Petropavlda eki er adam shetel azamattaryna Qazaqstan aýmaǵynda ýaqytsha turýǵa quqyq beretin jalǵan ruqsat qujattardy rásimdep otyrǵan. Olardy tintý kezinde kompıýterlik tehnıka, elektrondyq aqparat tasymaldaǵyshtar jáne túrli qujattardyń blankileri tabylyp, tárkilendi.
Qazirgi ýaqytta tártip saqshylary bul toptyń qyzmetin paıdalanǵan 70-ten astam shetel azamatyn anyqtady. Olar Qazaqstanda zańsyz jumysqa ornalasý úshin kúdiktilerdiń kómegine júgingen.
Sonymen qatar Astanada osy qylmystyq iske qatysy bar taǵy bir adam anyqtaldy. Quqyq qorǵaý organdarynyń málimetinshe, kúdikti shetel azamattaryna qajetti medıtsınalyq anyqtamalardy alýǵa kómektesip, olardyń Qazaqstan Respýblıkasynda bolýyn zańdastyrýǵa arnalǵan qujattardy rásimdeýge qatysqan.
Bul fakti oblys aýmaǵynda ótkizilip jatqan «Nelegal» jedel-profılaktıkalyq is-sharasy kezinde anyqtaldy.
Buǵan deıin SQO-ǵa turaqty turýǵa kelgen sheteldikter sany úsh ese óskenin jazǵan edik.
