SQO-da zańsyz qoqys oryndaryna qatysty 40-tan astam laýazymdy tulǵa jazalandy
PETROPAVL. KAZINFORM – Soltústik Qazaqstan oblysynda bıyl zańsyz paıda bolǵan 88 qoqys orny anyqtaldy.
SQO prokýratýrasynyń málimetinshe, olardyń barlyǵy drondardyń kómegimen tabylǵan. Zańsyz polıgondardyń jartysy búginde joıyldy.
- Óńirde qorshaǵan ortany qorǵaý jáne eldi mekenderdiń tazalyǵyn qamtamasyz etý baǵytyndaǵy jumystar kúsheıtilip jatyr. «Taza Qazaqstan» jalpyulttyq bastamasy aıasynda zańsyz qoqys oryndaryn anyqtaý, abattandyrý talaptarynyń saqtalýyn baqylaý jáne anyqtalǵan zań buzýshylyqtardy joıýǵa basymdyq berilgen. Bul baǵyttaǵy jumysty oblys prokýratýrasy úılestirip, ýákiletti memlekettik organdardyń ekologııalyq zańnama men abattandyrý erejeleriniń oryndalýyna qatysty sharalaryn baqylaýda ustap otyr, - deıdi prokýrorlar.
Nátıjesinde prokýrorlyq qadaǵalaýdyń 8 aktisi engizilip, 42 laýazymdy tulǵaǵa tıisti jaza qoldanyldy.
Mamandardyń aıtýynsha, qazirgi tańda eldi mekenderdegi eń jıi kezdesetin zań buzýshylyqtardyń qatarynda abattandyrý erejelerin saqtamaý, qoǵamdyq oryndardy lastaý jáne turmystyq qaldyqtardy belgilenbegen jerlerge shyǵarý bar. Saldarynan belgilenbegen jerge tógilgen qoqys ýaqyt óte kele turaqty polıgonǵa aınalyp, ony keıin tazartý jergilikti bıýdjetke qosymsha salmaq túsiredi.
Baqylaýdy odan ári kúsheıtý úshin jergilikti atqarýshy organdar qoǵamdyq oryndarǵa beınebaqylaý kameralaryn ornatýdy josparlap otyr. Jalpy oblys boıynsha 400 kamera ornatý kózdelgen. Olar qoǵamdyq oryndarda, saıabaqtarda jáne jaǵalaý aımaqtarynda ornalasady.
«Taza Qazaqstan» bastamasy aıasynda prokýrorlyq qadaǵalaý organynyń bastamasymen saıabaqtar, skverler jáne turǵyndar kóp jınalatyn demalys oryndaryn tazartý jumystary da uıymdastyryldy. Nátıjesinde 10 myń tonnadan astam turmystyq qaldyq shyǵaryldy.
Buǵan deıin ShQO-da jyl basynan beri 400-ge jýyq stıhııalyq qoqys orny joıylǵanyn jazǵan edik.
