SQO-da zańsyz 79 polıgonnyń joıylǵandyǵy týraly jalǵan esep berilgen
PETROPAVL. KAZINFORM – Soltústik Qazaqstan oblysynda jergilikti atqarýshy organdar ruqsat etilmegen qoqys polıgondaryn joıý týraly jalǵan derekter bergen.
SQO-nyń prokýratýra qyzmetkerleri jergilikti atqarýshy jáne ýákiletti organdar tarapynan qaldyqtarǵa qatysty ekologııalyq zańnama talaptarynyń saqtalýyna taldaý júrgizdi.
Nátıjesinde birqatar zań buzýshylyq, onyń ishinde, 79 ruqsat etilmegen qoqys polıgonynyń joıylǵany týraly jalǵan aqparat usynylǵany anyqtaldy.
SQO prokýratýrasynyń málimetinshe, Aqqaıyń, Qyzyljar, Mamlıýt, Taıynsha aýdandarynda jáne M.Jumabaev aýdanynyń aýmaǵynda qaldyqtardyń arnaıy belgilenbegen jerlerge jınaqtalǵandyǵy, sondaı-aq turmystyq qaldyqtarǵa arnalǵan polıgondar aýmaǵynan shyǵaryp tógý faktileri tirkeldi.
Sonymen qatar tekseris Mamlıýt jáne Qyzyljar aýdandarynda, sondaı-aq Petropavldaǵy qoldanystaǵy qatty turmystyq qaldyqtar polıgondary ekologııalyq talaptar men sanıtarlyq normalarǵa sáıkes kelmeıtinin kórsetti.
Ekologııalyq kodekstiń 365-babynyń talaptaryna qaramastan, Ekologııa departamenti naqty jáne júıeli sıpatqa ıe quqyq buzýshylyqtar boıynsha tıisti sharalar qabyldamaǵan, bul óz kezeginde óńirdegi ekologııalyq jaǵdaıdyń burmalanýyna ákeledi.
Prokýrorlyq qadaǵalaý aktisiniń nátıjesinde oblys ákimdigi 2025–2026 jyldarǵa arnalǵan, júıeli quqyq buzýshylyqtardy joıýǵa jáne óńirdegi ekologııalyq jaǵdaıdy jaqsartýǵa baǵyttalǵan is-sharalar josparyn bekitti. Qujatta qatty turmystyq qaldyqtar ornalastyrylǵan oryndardy kezeń-kezeńimen zańdastyrý, oryndalý merzimderi, qarjylandyrý kólemi, jaýapty oryndaýshylar jáne baqylaý tetikteri naqty kórsetilgen.
Ruqsat etilmegen qoqys úıindilerin joıý týraly jalǵan esepterdi usynǵany, ekologııalyq baqylaýdyń tıisinshe júrgizilmegeni jáne qorshaǵan ortany qorǵaý salasyndaǵy jumystardyń úılestirimelgeni úshin 13 laýazymdy tulǵa jazalandy. Olardyń qatarynda SQO ekologııa departamentiniń jáne SQO tabıǵı resýrstar jáne tabıǵat paıdalanýdy retteý basqarmasynyń basshylary jáne Aqqaıyń, Qyzyljar, Mamlıýt aýdandary ákimderiniń orynbasarlary tártiptik jaýapkershilikke tartyldy.
SQO tabıǵat qorǵaý prokýrorynyń qaýlysymen 12 aýyldyq okrýgtiń ákimi ákimshilik jaýapkershilikke tartylyp, olarǵa jalpy somasy 1,3 mıllıon teńge kóleminde aıyppul salyndy, barlyq aıyppuldar tolyq kólemde óndirildi.
Buǵan deıin SQO-daǵy Báıterek jáne Beskól turǵyndarynyń mazasyn qashyrǵan qoqys polıgony jabylǵanyn jazǵan edik.